بص بقي احنا خلاص بطلنا حد يفرض رأيه علي التاني.... احنا دلوقتي بنتحاور و يا تقنعني يا اقنعك.... انت شايف ايه بالنسبه لبكره الجمعة ١ ابريل ٢٠١١؟؟ ايه رأيك في الدعوة لإنقاذ ثورتنا و احياءها أو بمعني أصح تذكير البعض اننا لسه موجودين؟؟؟ قررت هتنزل ولا لأ و لا لسه ما قررتش و سايبها بظروفها؟؟ ممكن نفكر سوا؟؟؟ هعملها علي هيئة استبيان رأي كده... كام سؤال و الإجابه بنعم أو لا و في الآخر نحسب كام نعم و كام لا و برضه في الآخر ليك حرية الاختيار....
السؤال الأول: انت شايف الثورة نجحت نجاح نهائي و حققت كل مطالبها بجد و ان الشعب مالوش حق يطالب بحاجه تانيه؟؟
السؤال التاني: انت شايف ان كل الناس اللي قامت بسببهم الثورة أخدو جزاؤهم العادل أو حتي في اجراءات تضمن ذلك علي المدي البعيد؟؟
السؤال التالت: هل انت شايف ان نزول الشارع معناه تخوين للجيش؟؟ و انك من باب الثقة في الجيش و عدم الضغط عليه مش نازل؟؟
بالنسبة للسؤال ده عايز اقولك حاجه... انت غالبا أهلاوي... ماشي؟... (لو زملكاوي لو سمحت فوت الحته دي) أكيد تأثير الجمهور بيفرق و الا كنت عمرك ما فكرت تروح تحضر ماتش في الاستاد.... أكيد كتير جالك احساس ان الفريق بيلعب وحش بس يا رب يكسب علشان الألوفات دي ما ترجعش البيت مكسورين النفس....يعني انت ما بتروحش الماتش علشان انت مش واثق في فريقك بالعكس انت رايح تشجعه يحسن الأداء....
السؤال الرابع:مرتبط بالتالت: انت مش واخد بالك ان معظم المطالب بتتنفذ أو يتوافق عليها من الأربعاء للجمعة و خصوصا لما يبقي في دعوات لمليونيات؟؟ مثال: اقالة شفيق، الاعلان الدستوري ، منع فتحي و عزمي و صفوت من السفر؟؟
السؤال الخامس: انت شايف اللي بيحصل في طريقة ادارة البلد ده طبيعي؟؟
رحت الاستفتاء مش كده؟؟ قلت نعم ولا لأ ما تفرقش... الناس اتفقت علي نعم.... نعم لإيه؟؟؟ نعم لدستور ٧١ معدل بثمانية مواد.. ايه بقي في الكلام ده معناه اعلان دستوري زي اللي طلع ده؟؟....انت رايح تشتري مانجه من عند الفكهاني قام وازنلك كيلو و نص و مكملهملك تلاته بكنتالوب... خير ان شاء الله؟؟ أصل الكنتالوب حلو بس انت مش واخد بالك و بعدين المانجه موسمها خلص... و انت مال أهلك؟؟؟ أنا عايز مانجه يبقي مانجه.... ولا ايه؟؟؟
السؤال السادس: هل تضمن نزاهة الانتخابات البرلمانية و الرئاسية في ظل وجود كل أعضاء المجلس المزورين بتوع الوطني و المجالس المحلية اللي شاركتهم و ساعدتهم في التزوير و اللي بيسيطرو علي حاجات كتير أوي في حياتنا زي كل المرافق و الخدمات العامه؟؟
السؤال السابع: انت شايف ان مظاهرات يوم الجمعة بتوقف عجلة التنمية و الانتاج و تعطل العمل و تمنع وصول السلع الغذائية و تروع الآمنين؟؟
السؤال التامن: انت شايف اننا وصلنا للآستقرار و خايف علي الاستقرار ده؟؟ قبل ما تجاوب: لو انت من بتوع الاستقرار الأصلي بتاع السيد الاصطي حسني مبارك لو سمحت فوت المدونه دي كلها أما إذا كنت شايف اننا لازم نستقر دلوقت احب افكرك ان في ناس حاولت تبيعلنا موضوع الاستقرار ده يوم ٢٨ يناير و بعديها بعتولنا الجمال و الحمير و بعدين حاولو يبيعولنا قصة تفويض عمر سليمان علي انه واحد ما كناش نحلم بيه و بتاع الاستقرار برضه و بعدين شفيق بتاع البونبوني و الاستقرار اللي كان مطرمخ و قعد يلغوص في الفتنة الطائفية و بعدين أول ما قلبناه انهار جهاز أمن الدولة في يوم و ليلة.... لحد امتي هنفضل نجري ورا الاستقرار ده؟؟ ما نتقلب شوية علشان نستقر بقية تاريخ بلدنا....
السؤال التاسع: تقدر تضمن ان قانون منع التظاهر يتطبق صح ١٠٠٪ لعدم تعطيل العمل بالمؤسسات و ما يكونش ذريعة للقبض علي أي واحد يفكر يعمل مظاهرة حتي يوم الجمعة لوحده؟؟
السؤال العاشر: بصراحة كده.... هل عندك مشوار أو مصلحة بكره شايف انها أهم من نزول الشارع؟؟
أنواع المشاوير و المصالح يوم الجمعة الي حد ما معروفة....يعني لو هتجيب الجرايد بعد الصلاه و هتقعد تقراهم أدام التليفزيون يبقي انت ما عندكش ما يمنع لإن الجرايد مش هتطير و التليفزيون بيعيد كل حاجه.... لو عايز تزور الوالد و الوالده ... صدقني هيسامحوك لما يلاقو ان في حاجات اتحققت بسبب نزولك الشارع....لو عايز تفسح العيال في النادي أو تروح انت و اصحابك ، لما ربنا يسهل و الثورة تنجح فعلا أولا هيبقي عندنا نوادي أحسن ثانيا يمكن ربنا يكرمك و حالتك المادية تبقي أحسن و أحسن و تبقي من رواد نوادي أحسن ألف مره من اللي انت رايحه.... لو انت ناوي تعمل أوتينج أو باربيكيو في التجمع أو ٦ اكتوبر أو السليمانية أو حتي بني سويف الجديدة....بتهيألي ممكن تأجله علي أساس ان مش هينفع ولادك بعد كده يسألوك و انت كنت فين يومها يا بابا تقوللهم كنت عامل باربيكيو؟؟؟ أما لو انت زميل بقي و راجل جراح قد الدنيا و عندك عيان بعد طول انتظار و خايف تأجله يغضب و يمشي ماتشوفش وشه تاني... عايز اقوللك ان شغلنا لوحده محتاج ثورة....ان شاء الله احنا عندنا أمل نبطل نشتغل زي عمال التراحيل و نبقي لأول مره في التاريخ دكاتره و جراحين زي خلق الله في أي بلد بتحترم البني آدم.... أما لو عندك ندوة أو مؤتمر أو لقاء أو اجتماع أو أو....افتكر ايه اللي خلي الحاجات دي كلها ممكنه من غير اذن أمن الدولة و غيره...
أخيرا... عايز افكرك ان كل اللي وصلناله كان بسبب نزولنا الشارع مش قعدتنا علي الكنبة.... ما ينفعش بعد اللي وصلناله نبيع القضية فات الكتير ما باقي الا القليل و الجزء الصعب خلص بس لازم نحافظ علي مكاسبنا... لو سمحت فكر في الكلمتين دول و احسب اجاباتك كام نعم و كام لا و كام اجابه منهم في صالح نزولك معانا و كام واحده مع تجاهلك للدعوة و في الحالتين انت صح لإن ماحدش بيحب مصر قدك....
ليست هناك تعليقات:
إرسال تعليق