الفرق بين الناس اللي بتقول ان الثورة لسه ما خلصتش و الناس اللي بتقول كفايه كده و الثورة نجحت و حسني مشي زي الفرق بين واحد راكب عجله (دراجه يعني) و عارف انه راكب عجله و لازم يبدل علشان يوصل وواحد تاني راكب عجله برضو بس فاكر انه راكب موتسيكل .... هيدور الموتور و الموتسيكل يمشي لوحده بعد كده....بس هي عجله يا عم الحاج هتبدل هتمشي ...مش هتبدل ادينا قاعدين....
لساننا اتدلدل و احنا بنقول يا جماعه الضغط مطلوب لتحقيق مطالب الثورة و مطالب الثورة لسه ما تحققتش كلها يبقي
لثورة لسه ما خلصتش... يعني الأسبوع اللي فات كان زكريا عزمي مفخد في القصر.... الأسبوع ده مشرف علي البورش... و قلنا يا جماعه لاحظو ان مافيش اي حاجه ايجابيه بتحصل الا يوم الخميس أو الأربع و الخميس بالكتير لما يكون في دعوه لمظاهرات يوم الجمعه.....غير كده سامحني...
كلنا شوفنا فيديو ليلة القبض علي زكريا... ما نفسكش تشوف سيده في الموقف ده و كام واحد كده من زمايله؟؟ الجنرال و ترزي القوانين؟؟ و جيمي و بقية الشله؟؟ مش هيحصل و انت قاعد في البيت.. العزمي وقع بزفة الحرامي اهه....لسه الرسمي السيد السابق المقلوع....و النظمي اللي كان منظم النظام ابو شنب استيفان روستي ..صفوت بيه اللي مالوش في الشرف بتلاته ساغ جنرال ال... ولا بلاش و الفهمي اللي فاكر نفسه هو الوحيد اللي فاهم القانون و ازاي يظبطه و يقيفه علي مقاس سيده وولده.. و غيرهم و غيرهم...
النقطة التانيه المهمة جدا هي ضرورة نبذ الخلاف أيا كان سببه ما بين الناس اللي بتنزل الشارع.... مش مهم رأيي في غيري دلوقت... كلنا لينا هدف اسمي و اكبر ممكن نلوم بعض لوم خفيف كده و نفهم بعض ان في سلوك مستفز يا ريت نبعد عنه بالحسني كده من غير ما نهتف ضد بعض و نقصي بعض و كلام من ده.... هي دي بجد الثورة المضاده... ضربو الثوار بالنار ما نفعش... قالو عليهم خونة ما كلش مع حد... قالو عليهم شوية صيع معطلين حال البلد قلنا عند ام منص... انما زرع الخلاف بينهم و شق الصف؟؟؟ خطر حقيقي لازم نستأصله من بيننا.... ايه رأيكم نطبق المقولة دي:
| لا تحسن الظن بي كي لا أخذلك ولا تسئ الظن بي كي لا تظلمني, لكن اجعلني بِدونْ ظُنونّ كَيّ أكَونْ كَما أنَـا |
ما حدش قال سيب شغلك و تعالي.... احنا بنقولك بعد الصلاه يوم الجمعه بدل ما تقعد تقرا الجرايد قدام التليفزيون في الكافيه تعالي معانا في أي شارع في أي محافظه في مصر.... مصر محتجالك يا رأفت... كل واحد فينا النهارده يختار يا إما يبقي رأفت يا إما يبقي جوز اخت رأفت الفقري عارفين طبعا اخت رأفت دي كانت مين هه؟؟ كانت قاعده تعمل بيتزا و تشوي ريش ماشي؟؟؟ مستنيينك في الشارع ...
 |
| الشعب يريد مساكن الإيواء... فيلا ايواء السيد المقلوع في شرم الشيخ |
ليست هناك تعليقات:
إرسال تعليق