احنا بقينا بلد الأكشن و كله شرف في بورتو طره ماعدا الملظلظ

الظاهر ان المذاكره ليلة الامتحان في الزنقه دي خصله مصريه صميمة موجوده في جيناتنا كلنا...ما كانت الدنيا هاديه و الناس كانت قاعده في بيوتها أدام التلفزيون و سايبين الجيش يسوق... ايه اللي حصل؟؟؟ ولا أيوتها شيء....يا عم طره فاضي عايزين نشجع السياحه الداخليه.... ولا حد معبر....طيب أهه رجعنا للغلاسه تاني و العيال الثئيلة بتاعت الثورة و الهم ده عمالين يقولو جمعة أبصر إيه و جمعة ماعرفش ايه و مليونية و نكد..... نقوم نجررررررررري نجيب أبو الزيك الراجل المحترم الكمل و نظرفه ١٥ يوم فولبورد في بورتو طره..... ليه كده يا ولاد الحلال؟؟ هو لازم الناس تنزل الشارع و تقعد تشتم و تسب و تلعن و تقفل الميادين علشان تعملو شغلكم؟؟؟ اذا كان كده ماشي.....

طيب.... يوم الجمعه ٨ ابريل رجعت ثورة مصر بكامل قوتها و الملايين اللي نزلت التحرير شاهده.... و اليوم مر جوز اللوز و محاكمة المتنيل استمرت بنجاح رغم ما بدا في الفجر من بعض بوادر الشقاق اللي مش وقته ولا زمانه و مافيش ما يبرره أصلا.... أي حاجه تتعالج بيننا و نفضل اخوات ما ينفعش حد فينا يهتف ضد التاني و لا أي هبل من ده ...لو ده حصل تبقي فعلا الثورة ضاعت و الأوساخ ركبو.... ايه بقي قصة الظباط الأحرار ولا الشرفاء و لا أبصر ايه؟؟؟ حد يا عم قال اننا محتاجين ظباط جيش في وسطنا؟؟؟؟ حد قال اننا عايزين الجيش يمشي المشير؟؟؟؟ المهم اللي حصل حصل... هما دخلو في وسط الناس و الناس كانت عارفه ان دي حاجه آخرتها نكد... طيب يا عم البس مدني و نخرجك ولا من شاف ولا من دري... لأ .... طيب يا عم أهلك أهم عايزينك اطلعلهم....لأ.... المهم طبعا حصل المحظور و الجيش استغبي علشان يجيبهم لما العدد قل علي الفجر و الرصاص كان للركب و الله يرحم الشهدا الرجاله اللي رفضو انهم يسيبو الناس اللي في وسطهم أيا من كانو و أصرو يحموهم و دفعو حياتهم تمن  ده غير الناس اللي انضربت و اتكهربت و اتبهدلت.... و صاعقه و قوات خاصه و شرطه عسكريه و هم ما يتلم.... كل ده ليه؟؟؟ انت يا عم الجيش ماعندكش لا مؤاخذه نظام مخابرات يكتشفلك هذوها الموقف قبل ما الفاس تقع في الراس؟؟؟ و تلم شوية "العيال" دول و أنا مصر انهم شوية عيال ده مش سهو ولا خطأ لإنهم بهدلو رجالتنا و بهدلونا معاهم و علشان ايه؟؟؟ كسبنا ايه احنا من ورا عملتهم السودا دي؟؟؟ احنا مطالبنا كانت ولا زالت بتتحقق بالضغط علي المجلس العسكري في الشارع مش بالانشقاق و الانقلاب و الهوبا و التيتا....

الحلقة بتاعت يسري فوده مع اللواء العصار و اللواء عتمان كل الناس كانت منتظراها علشان كم الأسئله اللي خلفتها أحداث الجمعه و السبت تحديدا و أحداث البلد عامة .... ملخص اجاباتهم: الجيش ما يعملش حاجه وحشه أبدا و عايزين نبطل اشاعات و الناس اللي في الميدان دول مش هما شباب ٢٥ يناير....و بعدين اللواء عتمان كان مصر يدخل حرب ٦٧ في الموضوع مش عارف ليه بس طالما هو اللي فتح السيره بقي عايزين نقولله ان الكلام اللي انت بتحاول تقنعنا بيه ده كان ينفع يتقال سنة ٦٧ ماشي انما دلوقت صعب موت..... قاللك احنا ما كانش معانا رصاص حي... طيب امال اللي مات مات ازاي؟؟ و بعدين لو انت ما معاكش قوللنا مين اللي كان معاه...نورنا و بعدين احنا مش بتوع ضرب و تعذيب... طيب طالما الحكايه كده يبقي أنا بقي مضطر اكتبلكم شوية تعليقات من اللي كتبها الشباب من الميدان علي تويتر ليلة ٩ ابريل و احكمو انتم.....

Radwan_Adam
حالة هلع شديدة خلقها تدخل البلطجية بتوع الشرطة العسكرية والأمن المركزي .. لازم الناس تنزل تعتصم في الميدان بكثافة تاني وما تروحش مبارك رجع
4/9/11 3:38 AM

sherif_azer
الجيش حيفضل يتغابى كده لحد ما واحد من المتظاهرين يستشهد و ساعتها تحصل الكارثة #tahrir
4/9/11 3:41 AM

Mahienour

فعلا اللي بيحمي فى حسني مبارك .. عمره ما يحمي داري و دارك
4/9/11 3:46 AM

AmrBassiouny
Maybe some officers were arrested, but i saw at least 7 out to safety.
4/9/11 3:42 AM

MaLek
رجل بيصرخ في باب اللوق, وبيقول اعزل والجيش المصري بيفتح علي الرصاص جيش بلدي, بيفتح علي الرصاص الحي, خدمته 7 سنين وفتح علي نار #tahrir
4/9/11 3:47 AM

basboussa1
لمانزلت الدبابات و إحنا صمموا مانمشيش كان الضباط اللي جايين يضربونا بيعيطوا وبيترجونانمشي #Tahrir بالتأكيد كانت الأوامر يضربونا
4/9/11 4:29 AM

Thawrah
سيارات الإسعاف ابتعدت وتركت الجريح ينزف على الأرض وحوله مجموعة من العسكر تبرحه ضربا - الجزيرة مباشر مصر #Egypt #Jan25 #Tahrir
4/9/11 5:00 AM

رصاصة (لا مؤاخذة حية) تخترق سور في التحرير من مخلفات ٩ ابريل

و الدم ده ايه؟؟ دابحين فراخ ولا كاتشاب من كنتاكي؟؟

الفوارغ الطويله دي الي فشنك...ماشي...طب و القصير ده ايييه؟؟؟

طيب.... واضح ان الجيش اتغابا فعلا بس هما حبو يوضحولنا ان كل ده بسبب العيال الظباط اللي دخلو في وسط الناس بدليل ان تاني يوم ماحدش جه ناحية الميدان خالص و سابو الناس تعتصم عادي جدا في ساعات الحظر يبقي كان لازم اللوا عتمان بتاع الهاشتاج اللي علي الفيسبوك ده (علي فكره الهاشتاج ده حاجه تبع تويتر مالهاش أي علاقه بالفيسبوك) يعتذر أو يبدي أي ندم أو تأثر بدل ما يقعد يقنعنا ان اللي حصل ده كان هلوسه من عقولنا المريضة....

الحقيقة اللي حصل ده عكنن علينا و ضيع فرحتنا بعودة الثورة و لكن توقعاتنا بأن يكون الأسبوع عمران بإسهال قرارات تحققت... الأول الأخ النظيف راح بورتو برضه و بعدين بالرغم من اننا اتفقعت مرارتنا بحديث السيد المخلوع للعربيه اللي طلعلنا فيه لسانه و أعلنلنا إنه فيش الهوامش و دفس فلوسنا و ابقو قابلوني لو شوفتو مني مليم و هارفع عليكم قضية تشهير... انما بمجرد انتهاء الحوار البناء ده أصدر النائب العام قرار باستدعاء الأخ البريء ده وولده... مش بس كده الشنب العريق.... الجنرال بتاع السيكو بيكو .....النظمي بتاع النظام كله ....تاني التقايل ...شرف هو كمان مع الحبايب... وقال ايه و هما بيحققو معاه قام يصلي الضهر... يا سلام يا سيدنا....انت بالذات من دونهم كلهم ... يا حلاوتك... مش باقوللكم احنا بقينا بلد الأكشن... ٣٠ سنه ملل و دلوقتي الدقيقة فيها ٣٠ حدث... عموما احنا كده عملنا واجب جامد قوي مع اتنين من الثلاثي المرح.... لسه عم لظاليظو سيد قراره المتين.... أنا باقترح عليه انه يريح دماغه من قصة التحقيق دي و يروح يحجزله زنزانه هاويه كده في الكومباوند قبل ما ينشغلو كلهم و ينام في الحوش....

نداء الي كل الاخوة ظباط الجيش... يا ريت ماحدش يكرر العملة دي تاني ...احنا مرتاحين لوحدنا كده و مزاجنا عنب و طلباتنا بتتنفذ و كله تمام... عايزين تخدمو خليكو في أسلحتكم و نفذو أوامر القاده بتاعتكم و اعملو واجبكم و الله الموفق...