س: اسمك و سنك و عنوانك..
ج: محمد حسني السيد مبارك ٨٢ سنه مواليد محافظة المنوفيه...فيلا ٢١٢ منتجع الجولف شرم الشيخ بمحافظة جنوب سيناء....
س: ما قولك يا سيد محمد فيما نسب اليك في البلاغ المقدم من ٨٥ مليون مواطن مصري إلي سيادة النائب العام من اتهامات بسرقة تاريخ وطن علي مدي ٣٠ سنه و قتل أبنائه و تخريب مستقبلهم و بيع أرضهم و التآمر علي مقدراتهم و تجويعهم و تشريد عيالهم و تضييق سبل الرزق حتي ضاقت الأرض عليهم بما رحبت....بل انك حرضت علي قتل و سحق من تبقي منهم بالرصاص الحي لمجرد اعتراضهم السلمي علي كل ماسبق.......
هكذا تخيلت التحقيق الذي أداره المستشار مصطفي سليمان مع حسني مبارك بمستشفي شارم الشيخ الدولي أو هكذا أردته أن يكون....ياااااااااااااه يا مصر معقول؟؟؟ ده بجد ولا احنا بنحلم يا مصر؟؟؟ داحنا كان اقصي أملنا الأسبوع ده بعد المليونه لم شمل الثلاثي المرح في بورتو طره.....يقوم اللي يحصل ده يخلي وقع خبر القبض علي فتحي سرور بالظبط زي وقع خبر القبض علي سواق تاكس بعد خناقته مع بياع البطاطا علشان الحمار اللي جارر العربيه اتلكع ادامه شويه....
مليونية يوم الجمعه و الحق يتقال برضه، شوية البلبله اللي عملها ظباط الجيش المنشقين و الغشوميه اللي الجيش عالج بها الموقف قلبو الدنيا الأسبوع ده.... احنا مش ملاحقين يا اخواننا علي القرارات و الحبوسات....بس كله كوم و مبارك و عياله دول كوم تاني... بعد اللي شوفته من أعداد في ميدان التحرير يوم الجمعه أيقنت انه داخل داخل بس ما تخيلتش انها هتكون بالسرعه دي...
النهارده عيد يا مصر...١٣ ابريل ٢٠١١ تاريخ لا يقل أهميه عن ٢٥ يناير و ١١ فبراير...رحم الله شهدائك يا بلدي... كل شهيد سقط و هو بيحارب الطغيان و الظلم أو كان ضحيتهم...النهارده نقدر نقول لأهله و لنفسنا ألف مبروك...النهارده لقيت نفسي باكلم الحاجه ليلي والدة خالد سعيد...قلتلها ألف مبروك يا أمي حق خالد رجع..قالتلي ألف مبروك لينا كلنا....حقنا كلنا رجع....
يا تري راضيه عننا يا مصر؟؟ يا تري احنا وفينا حق الشهيد؟؟
كلمت ام خالد سعيد؟؟؟انت فخر لنا ايها الطبيب الثورجي العظيم و فخر لأبناء اسيوط جميعا
ردحذفسماح زكي