حوار مع صديقي المواطن المصري

س: هو احنا محتاجين رئيس عسكري زي السيسي ليه؟
ج:عشان البلد مليانه فوضي و تسيب أمني و إرهاب. 
س: هو مين اللي هيحارب التسيب و الفوضي و الارهاب لما السيسي يبقي رئيس؟ 
ج: الشرطة و الجيش. 
س: و إيه اللي السيسي يقدر يعمله للشرطة و الجيش و هو رئيس ما يقدرش يعمله و هو وزير دفاع خصوصا ان الدستور الجديد مقلص سلطات الرئيس؟ 
ج:................ 
تبادل أدوار... ثم س: قصدك ايه يعني؟؟ مين بديلك طيب ولا هو كلام و السلام عايز حمدين يعني ولا ابو الفتوح ولا مين؟؟ 
ج: هي دي بقي اللي اسمها مغالطة منطقية...السؤال ده بيتسأل من أيام خطاب مبارك 1 فبراير... الاجابة ببساطة ان أي واحد مواطن شريف ينفع و ده اللي نص عليه الدستور لأني مش عايز رئيس يحكم البلد أنا عايز بلد مؤسسات يعني عايز مجلس نيابي منتخب هو اللي يحكم البلد. 
س: طاب و ماله انتخب مجلس و السيسي يبقي رئيس ايه المشكلة؟ 
ج: اذا كنا مش قادرين ننتقده دلوقت هننتقده ازاي و هو رئيس... تقدر تنزل تشيله زي مرسي لو ما عجبكش؟ رئيس مدني مع شعبنا يعني بني ادم اي حد يختلف معاه أو يأيده... ينجح بخمسين و يقعد مده بالكتير... مش صوره تملا الميادين و الشعب يبوس ايده عشان يترشح.. 
س: يعني احنا سيبنالكم البلد تلات سنين عملتو ايه؟ جبتولنا الاخوان و كل يوم مظاهرات و قرف
ج: أولا ماحدش ساب البلد تلات سنين ولا حاجه... مجلس عسكري ثم شعب انتخب الاخوان( اللي اتفقوا مع العسكري) و وافق علي كل استفتاءاتهم ثم حكومة مؤقته بهيمنه عسكرية ثانيا ماحدش جابلكم حاجه انتو اللي نزلتو انتخبتوا ثالثا المظاهرات دي ما كانتش كلها ثورة ياما اضرابات و مظاهرات في مصانع و جامعات عشان تثبيت و زيادة مرتبات و قد كان... 
و يستمر الحوار.....

هكذا كانوا...رعية و حكاما (٣): كيف دخل النحو إلي اللغة؟

لما دخل العربان و العجم في دين الله أفواجا جاء سيدنا علي أمير المؤمنين بأبي الأسود الدؤلي و قال له يا أبا الأسود الناس يلحنون في كتاب الله فضع قواعد للغة فاعتذر أبو الأسود لجسامة المسؤولية. أحضر سيدنا علي أحد هؤلاء الذين دخلو في الاسلام حديثا و سأله أن يقرأ القرآن في طريق بيت أبي الأسود فجلس الرجل يقرأ "براءة من الله " من سورة التوبة حتي قرأ "أن الله بريء من المشركين و رسوله" قرأها الرجل بكسر اللام في رسوله، فخرج أبو الأسود منزعجا قائلا أوتبرأ الله من رسوله؟؟؟؟ و قرر أن يتصدي للمسؤولية ووضع علم النحو كما نعرفه و سمي نحوا لأن سيدنا علي أمتدحه قائلا ما أعظم النحو الذي نحوته يا أبا الأسود...
"إنا نحن نزلنا الذكر و إنا له لحافظون"
صدق الله العظيم

هكذا كانوا...رعية و حكاما (٢) طاووس بن كيسان و هشام بن عبد الملك

كان الخليفة هشام بن عبد الملك في البيت الحرام في موسم الحج وكان جالسا بين أصحابه من أهل الحجاز فقال لهم: ابحثوا لنا عن عالم يرشدنا إلى معرفة المزيد من أحكام الحج وسائر العبادات فبحثوا فوجدوا طاووس بن كيسان جالسا في إحدى زوايا الحرم فطلبوا منه أن يذهب معهم إلى الخليفة فلبى الطلب، فلما دخل عليه خلع نعليه بطرف بساطه، وسلم عليه من دون أن يدعوه بأمير المؤمنين كما كانت العامة تسلم عليه، بل خاطبه باسمه هشام دون أن يكنيه بكنيته . ثم جلس على بساطه قبل أن يسمح له بذلك، فكونت هذه التصرفات غضبا عميقا داخل نفس الخليفة حتى بدا الغيظ في ملامح وجهه، فأمسك الخليفة غيظه وكظمه وأخذ يوجه إلى العالم الجهبذ طاووس شيئا من العتاب الرقيق في نظره، فقال له: ما حملك يا طاووس على ما صنعت؟ فقال: وما الذي صنعته؟ فقال الخليفة: خلعت نعليك بحاشية بساطي.. ولم تقل يا أمير المؤمنين، وسميتني ولم تكنني، ثم جلست من غير إذني، فلما انتهى الخليفة من هذه الأسئلة أجاب طاووس بهدوء تام قائلا: أما خلع نعلي بحاشية بساطك فأنا أخلعها بين يدي رب العزة كل يوم خمس مرات وقد فعلها من هو أفضل منا جميعا وكذا خلفاؤه من بعده وسائر الأمة تفعله إذا وقفت بين يدي الله، وأما قولك: إني لم أسلم عليك بإمرة المؤمنين فلأن جميع المؤمنين ليسوا راضين بإمرتك، وقد خشيت أن أكون كاذبا إذا دعوتك بأمير المؤمنين، وأما قولك: إني ناديتك باسمك ولم أكنك فإن الجواب على ذلك أن الله عز وجل نادى أنبياءه بأسمائهم كما في القرآن الكريم، وكنى أعداءه وقد ورد هذا أيضا في القرآن الكريم، وأما الأخيرة وهي جلوسي قبل أن تأذن لي، فإني سمعت أمير المؤمنين علي بن أبي طالب رضي الله عنه يقول: إن أردت أن تنظر إلى رجل من أهل النار فانظر إلى رجل جالس وحوله قوم قيام بين يديه فكرهت أن تكون ذلك الرجل الذي عد من أهل النار والعياذ بالله. عندها لم يجرؤ هشام بن عبد الملك أن يتفوه بكلمة غير هذه الكلمة: عظني يا أبا عبد الرحمن فأخذ طاووس ابن كيسان يعظه ويذكره بعظم مسئوليته أمام الله عز وجل يوم القيامة، أن من لم يعدل في رعيته فإن هناك في الدار الآخرة أصناف العذاب تنتظره. وبعد أن انتهى العالم الناصح طاووس من موعظته قام وانصرف

هكذا كانوا...رعية و حكاما

أرسل هارون الرشيد إلي الامام مالك بن أنس رضي الله عنه و عن أبيه يطلبه ليستفتيه في بعض الشئون فرد مالك الرسول و قال له قل لأمير المؤمنين أن العلم يؤتي إليه و لا يذهب إلي أحد فأرسل هارون يطلب ميعادا للذهاب الي مالك فأخبره الأخير أن درس علمه في الروضة الشريفة بعد صلاة العصر و شدد عليه أن يأتي مبكرا لأنه إن تأخر و جاء يتخطي الرقاب ليجلس في مقدمة الصفوف فسوف يحرجه أمام الناس ...ذهب أمير المؤمنين قبيل صلاة العصر ظنا منه أن هذا هو (التبكير) فوجد الصفوف قد اصطفت منذ صلاة الظهر فما كان منه الا أن جلس في مؤخرة الصفوف فلما حضر الإمام مالك للدرس وجد هارون أنه لن يستطيع أن يري وجه الامام من موقعه و النظر الي وجه العالم عباده لا يفوتها مثل هارون فطلب كرسيا يجلس عليه ليري من فوق الصفوف...بدأ مالك حديثه بسؤال "إلاما وصلنا في درسنا الأخير؟" فأجابوه: الي فقه نواقض الوضوء...قال مالك: "إذن فلينتظر الفقه إلي الدرس القادم...سأحدثكم اليوم عن الولاية" ففهم هارون الرسالة و ترك كرسيه و جلس وسط الناس يستمع الي الدرس....
هل فهمتم يا من تحكمون باسم الاسلام؟؟؟

انت زعلان من شباب الثورة ولا من الثورة نفسها؟؟؟

في ناس كتير غاضبة علي من يطلق عليهم شباب الثورة أو من أظهرهم الاعلام في هذا الإطار...ما اقدرش الوم الناس دي لإني في فترة من الفترات برضه حسيت كده اني مخنوق من الناس اللي بتطلع في التلفزيون تقول لما كنا في الميدان او لما خططنا للثورة و انا لا وصلتني خطه منهم ولا اعرفهم قبل كده و كنت بانزل الشارع.... انا بس عايز اقول ان كون الناس كرهت الشباب دول او اتخنقت منهم دي خطة مدبرة من الاعلام الفاشل بتاعنا بالاضافة لاخطاء ارتكبها الشباب برضه في تعاملهم مع هذا الاعلام الفاشل....

احنا شعب متعود ان تلاته اربعه بس هما اللي بيظهرو في التليفزيون و الجرايد...أولهم طبعا السيد الرئيس و بعدين لعيبة المنتخب و الأهلي و شوية مطبلاتية...احنا مش متعودين نشوف حد مننا عليه تركيز او اهتمام اعلامي رغم اننا شعب منتج و مبدع و الله ما تصدقوش اللي بيقوللكم غير كده انما هو ده سلو بلدنا...زويل ماحدش عرفه الا لما خد نوبل...ابو تريكه ماحدش عبره الا لما راح الأهلي و في بقي امثله بين ده و ده ...فينا ناس كتير شايفه انها احق بالظهور ده و انهم تعبو في حياتهم كتير و ماحدش عبرهم في حين ان الوظيفة اللي بدعها الاعلام "ناشط سياسي" دي بقت اسهل وسيلة للوصول الي الشاشات...كون ان ده يولد غضب انا شايف انها نتيجة طبيعية...انا واحد شغال في مستشفي بتخدم قطاع عريض من شعب مصر في الصعيد هي مستشفي أسيوط الجامعي...(و لما اقول الصعيد يعني تلتين مصر الخالي تماما من مستشفيات وزارة الصحة الفاعلة ما تقارنوش مستشفيات وزارة الصحة في القاهرة بمثيلاتها في الصعيد...) الخدمه دي تقدم باقل الامكانات و اقل الدعم الحكومي و في ظل قوانين غبية تصيب بالشلل .... و بعد كل الهم ده تلاقي مستشفي زي ٥٧٣٥٧ دي مثلا واخده شو اعلامي ما حصلش لمكان يقدم خدمه افضل كثيرا من حيث العدد و النتائج في تاريخ مصر كلها و التبرعات شغاله الله ينور و البهوات يروحو يتصورو هناك و ماعرفش ايه....لازم طبعا اشعر بالظلم....شيء عادي يعني...و انا باتكلم عن مستشفي بتعالج الناس...فما بالكم بشباب عادي زي ولادنا و اخواتنا و أبناءنا؟؟؟

بعد المقدمه دي اللي شكلها كده بتلتمس العذر لمن كره الثورة بسبب شبابها عايز اسأل سؤال....لما انت زعلان من الشباب دول و مش طايقهم كده...كنت بتتفرج علي التلفزيون ازاي قبل الثورة؟؟؟ لما كان الدكتور مصطفي عبده مثلا يقعد مع الأستاذ ماعرفش مين و الكابتن أبصر إيه عشان يحللو مباراة تليفونات بني سويف مع بني عبيد علي مدار  خمس ساعات؟؟؟؟ ولا لما الأستاذ علاء مبارك اتصل بالأستاذ برضه خالد الغندور و فقعنا خطبه عن كرامة المصري اجهش الأخير علي إثرها بالبكاء؟؟؟؟ كنت مستحمل ازاي الخلق دي؟؟؟؟ كنت بتتفرج ازاي علي سيد علي و هناء ولا علي خفة دم أم عمرو أديب؟؟؟؟ كل الأشكال اللي ثبت انها معارضه شكلية بتعارض بأوامر من أسيادها عشان تيجي بعد كده تطعن في أي حد يفتح بقه و يقول لأ تقوم حضرتك تصدقهم علي اعتبار انهم ضد النظام....

مافيش شك ان شباب الثورة برضه ما حسبوش الحسبه كويس...افتكرو ان الناس اتغيرت و انهم هيقابلوهم بالورود و هما بيردو بحده علي ناس أكبر منهم سنا، أصغر من أصغر واحد فيهم مقاما...نسيو اننا ما عندناش الفكر ده..ماعندناش فكر اننا نشيل العيب علي جنب و نحاسب احمد شفيق علي تغطيته لتهريب أموال مبارك و بلاوي أمن الدولة قبل ما نحاسب علاء الأسواني علي حدته...نحاسب المجلس علي قتل الشباب قبل ما نحاسب أسماء محفوظ علي انها شتمته...نحاسب اللي شهد زور في محاكمة مبارك قبل ما نحاسب نواره علي انها فضحتهم....بس مش كل الشباب وقعو في الفخ ده...يعني وائل غنيم مثلا...فين وائل غنيم؟؟؟ وائل فهم اللعبة مباشرة بعد لقائه الشهير مع مني الشاذلي و محاولات التشويه الواسعه اللي اتعرض لها حتي انهم عملوله شخصية مخصوص مكرسة لهذا الهدف اسمها أحمد سبايدر...و المقارنه بينهم توضح الفرق بين شباب الثورة و من يحاولون تشويههم...وائل ادرك ان تأثيره مش في الاعلام اللي اكيد مش ناوي يكرمه فعاد لقواعده و ابتعد عن كل هذا اللغط....

سواء كنت زعلان من الشباب دول أو مش زعلان...الثورة دي مش بتاعت حد الثورة دي ملكنا كلنا...ملك كل واحد استشهد أو أصيب أو نزل الشارع أو حتي أيد بتبرع أو برأي أو بالقلب...ملك أولادنا و مستقبلهم....اللغط الاعلامي اللي خلانا نكره الشباب دول هو أحد الأسباب اللي تخلينا نستمر في ثورتنا عشان نطهر الإعلام ده و نخليه ملك لشعب مصر...يخدم الشعب كله و يديله حقه...و كل مبدع أو صاحب فكر ياخد مساحته و حقه في الإعلام ده...الا إذا كنت متخذ الموضوع ده حجه انك تنتقد الثورة و تعرض عنها...ده موضوع تاني...ياريت كل واحد فينا يصارح نفسه بما فيها و يسألها...و لو لقي نفسه ضد الثورة يقول...مافيش مشاكل انما مافيش داعي للتلوين بقي 

استمتعو بالكالسونات اللي لابسينها تحت هدومكم

لولا فضل الله علي عباده ممن كانو في الميدان و من كانو في ماسبيرو و محمد محمود و القصر العيني و فخ العباسية و احمد حرارة و احمد مكي و مينا دانيال

و علاء عبد الفتاح و نواره نجم و كفاية و ٦ابريل و ائتلاف شباب الثورة و الناس اللي اعتصموا عند مجلس الوزرا و الناس اللي نزلت الشارع في كل حته في مصر...الناس اللي قلتو عليهم بلطجية و كلامهم كتير و دمهم تقيل و نازلين لابسين ع اللحم و اتهمتوهم في شرفهم...... لولا فضل الله عليهم و عليكم لكنتم صحيتم علي الخبر ده ...جمال مبارك رئيسا لجمهورية مصر العربية....و ما كنتوش فتحتو بقكم و كنتو ساعتها هتقعدو تمصمصو شفايفكم و تلعنو الزمن و المخططات الاجنبية و خنوع الشعب..... استمتعوا بقدرتكم علي الانكار و الاسقاط و بالكالسونات اللي انتو لابسينها تحت هدومكم و انتو نازلين الشارع

يسقط يسقط حكم العسكر: أحداث أسيوط 19 ديسمبر 2011

يمكن اللي هاقوله النهارده مافيهوش كلام جديد لإنه بقي حدث يومي و يمكن كمان اقل من اللي بيحصل كل يوم في الفترة الأخيرة بس الحقيقة أنا هاقوله تذكرة لنفسي أولا و برضه كلمه للتاريخ ثانيا.....

سهل جدا انك تدس كام واحد في وسط ألاف المتظاهرين عشان يفتعلو مصيبه و يلبسوها للألاف دول أمام الناس و الاعلام و تطلع انت الحمل البريء المعتدي عليه يا حرام من شوية بلطجية حشاشين عايزين يخربو البلد.....انما لما يكون المتظاهرين دول بالكتير خمسين واحد يعني ملو أتوبيس بالعافيه و كلهم عارفين بعض كويس لأنهم بقالهم سنه كامله بينزلو مظاهرات مع بعض الموضوع هيبقي صعب شويه....كمان لما تبتدي تعتدي عليهم بعد خمس دقايق من الهتاف ده يصعب المهمه أكتر...لكن مين أصلا اللي يهمه لعبة الاعلام دي في بلد زي أسيوط؟؟؟ اذا كان ماعدش مهتم يحبكها أوي في ميدان التحرير اللي كل العيون و الكاميرات عليه هيعمل كده ف أسيوط؟؟؟ أكيد لأ...

النهارده 19 ديسمبر 2011 الساعة واحده و نص الضهر بناء علي دعوة انتشرت ع الفيسبوك توجهت مجموعه من النشطاء اللي هما تقريبا معظم متظاهري أسيوط الي مقر قيادة المنطقة الجنوبية في بني غالب اللي تبعد 10 كم عن مدينة أسيوط للتظاهر أمام المقر احتجاجا علي أحداث التحرير الأخيره...الحقيقة من أول ما وصلتني الدعوة حسيت اننا هنبقي صيد سهل جدا لإن المقر ده في منطقه تقريبا صحراويه....مافيش هناك الا بعض المنازل وورش اصلاح سيارات نقل و مخزن بيبسي و الناس في المنطقة دي تعاملاتهم مع قيادة المنطقة دي تعاملات يومية و بينهم مصالح كتير فتصورت اننا ممكن بسهولة ندخل في فخ المواطنين الشرفاء المعتاد...لكن الحقيقة لا قدرت أحذر الشباب ولا قدرت اسيبهم ينزلو من غير ما أروح معاهم و قلت نحاول ع الأقل نخلص النية لربنا إننا رايحين نقول للظالم انت ظالم في عقر داره....

المهم الشباب سبقونا بالأتوبيس و انا ركبت العربيه مع د. ضياء و توكلنا علي الله....وصلنا لقينا الشباب متجمع عند مكان اسمه مركز الاشعاع الحضاري و لسه ما ابتدوش المظاهرة...جددنا الاتفاق اننا لازم نلتزم تماما و ماحدش يفكر مجرد تفكير حتي انه يوطي ع الأرض يجيب أي حاجه حتي لو كان هيربط جزمته لأنه هيضرنا كلنا و كان في بانر كبير متجهز هتشوفو صوره حطيناه في الصف الأول و مشينا لغاية البوابة الوسطي لقيادة المنطقة و ابتدينا الهتاف.....

في الأول كانت البوابة مقفوله و في زي كشك حراسه في وسطها معمول بزجاج عاكس بس قدرت اميز حركه داخله.....بعد حوالي خمس دقايق هتاف أو نخليهم عشر دقايق عشان مابقاش متجني عليهم اللي هما غالبا الوقت اللي خده الظابط اللي طلعلنا في النزول من مكتبه انفتح الباب و طلعلنا سيادة عميد الشرطة العسكرية و علي وجهه نظرة كده بتقول ايه شوية العيال الهبل دول؟؟؟؟ المهم.... جه قاللنا التالي...امشي منك له من هنا....ولا واحد يقف هنا...امشي بدل ماخدك جوه و طبعا مش هادعي ان الشباب سكت ....هو بقي اعتبر ان دي مفاوضات كافيه و انه عمل اللي عليه في الدقيقتين دول و الله دقيقتين هتشوفوهم في الفيديو مش قاطع منه حاجه و يادوب ادانا ضهره و مشي كام خطوة و اذا بالباب يفتح علي مصراعيه و تخرج منه فرقة شرطة عسكرية عددهم واحد لكل واحد مننا ع الأقل و شكلهم مش جايين يتفاوضو خالص....المفاوضات خلصت و معاهم ظابط صغير أو شاويش و حاولو الأول لمدة عشر ثواني كده يزقونا و يخطفو البانر و بعدين قررو انهم يسحلونا...

الصواعق اشتغلت و العصيان طارت في الهوا و انا في المرحله دي كنت باجري بعزم ما فيا و سامع الطقطقة بتاعت الزفت الكهربائي ده عماله تقرب...و بعدين فجأه وقفو و رجعو لورا شوية فاحنا ابتدينا نتجمع تاني و ابتدت ناس تهتف...سابونا نهتف ييجي 30 ثانيه و بعدين قررو انهم ينهو الموقف السخيف ده فراحو هاجمين تاني...الهجوم التاني ده كان علي بتاع 25 واحد كده و الباقيين متفرقين بعيد....طبعا جرينا جري السنين بلا هدف لأننا أولا في منطقة مانعرفهاش ثانيا دي منطقتهم يعني اللي هيتمسك هيلبس تهم مالهاش أول من آخر ده اذا عاش أصلا لغاية ما يسمع تهمه...كان لازم الاقي حته استخبي فيها لإني مش العداء الأوليمبي يعني و كنت باجري أصلا ناحية الصحرا اللي هما ليهم فيها بوابه تالته يعني حتي الاتجاه كان غلط....جريت علي أول بيت قابلته لكن السكان دخلو بسرعه و قفلو الباب و لقيت باب جنبه رحت داخل علي سلم و طالع دور و مستخبي...كل ده وانا حاسس ان نفسهم في قفايا و مستني الشومه تنزل علي دماغي ف أي لحظة وسامع الطقطقة بتاعت الصاعق عماله تقرب بس لا كان فيا نفس أجري ولا في مكان أصلا أجريله...قعدت أدعي اللهم إني أدرأ بك في نحورهم و أعوذ بك من شرورهم... الناس اللي في الدور التاني فتحو الباب و اتفزعو ف الأول لكن طمنتهم...قلتلهم أنا دكتور ما حدش يخاف أنا هاستخبي لغاية ما يمشو..بعد تردد قصير دخلوني عندهم و ابتدي رب البيت يقوللي و انتو ايه بس اللي جابكم هنا...انتو جايين لغاية عندهم؟؟؟ قلتله احنا جايين عشان حقك و حقنا...قاللي البلد باظت خلاص و ماعدش فيها حقوق..الراجل شافني تعبان قرر انه يسيبني ف حالي...كلمت الدكتور ضياء صديقي اللي جيت معاه اطمنت انه بخير و انه واقف مراقب الموقف قاللي انهم ماليين الشارع و الحقيقه دي ما كانتش غايبه عني في ظل صوت الزفت اللي عمالين يطقطقو بيه في كل حته ده....أهل البيت كانو مثال للشهامه و المروءة ... و شويه و اكتشفت اني مش لوحدي اللي استخبيت في البيت ده كان في تلاته تانيين مستخبيين في الدور اللي تحت و طلعو فوق و اتناقشنا مع رب البيت تاني و قاللنا انه كان من الناس اللي عملت مظاهرات الأبنية التعليمية في آخر أيام مبارك لكن هو مقتنع ان البلطجية خربو البلد و قطعو عيش الناس...قلناله طيب نفترض فعلا ان اللي في الشارع دول بلطجية...ليه ماحدش بيحاكمهم و هما متصورين صوت و صوره؟؟؟ يعني أجهزة القوات المسلحة دي كلها مش عارفه تلم البلطجية دول؟؟؟ و قاللنا كمان انه كان شايفنا من أول ما جينا و اننا ما عملناش أي حاجه تخليهم يضربونا و انهم أول ما طلعولنا قعدنا نقول سلمية سلمية...

عرفت من الناس اللي كانو معايا ان واحد مننا اسمه يحيي اتمسك و ان في بنت اتمسكت بس السكان اتفاوضو مع العساكر في ساعتها و خلوهم يسيبوها...عرفت كمان ان في عضو مجلس شعب عن قائمة حزب النور الأستاذ محمود عشماوي جه علشان يساعد في التفاوض للإفراج عن يحيي و انهم برضه يسيبو الشارع عشان نمشي...بعد حوالي ساعه في البيت...دخل واحد من أمن مخزن شركه قريب و قال هننزلكم علي مرتين عشان ما ياخدوش بالهم و أخد اتنين و نزل...بعد ما نزل عرفنا ان الشرطة العسكرية سابت الشارع رحنا نازلين....

الناس اللي كنا في بيتهم أكرمونا و حمونا لكن القصة لم تخلو من سيناريو المواطنين الشرفاء برضه!! و احنا نازلين لقينا موتسيكل راكن أمام البيت و عليه واحد ييجي ٤٥ سنه كده قعد يشتم فينا و في أهل البيت اللي كانو مخبيينا علي أساس اننا العيال الوسخه اللي خربت البلد و طبعا أمطرنا بسيل من أقزع الألفاظ الموجوده في قاموس الأباحه...ناس مننا حاولو يتفاهمو معاه و ان عيب وبتاع طبعا لا حياة و (لا حياء كمان) لمن تنادي...المشكلة كمان اننا كنا لسه في منطقة العسكر كان لازم ننهي الحوار الشيق ده بسرعه و نمشي....

يمكن تبدو فكرة المظاهرة هبلة و متهورة لكن ليه؟؟؟ لو احنا ف بلد الانسان فيها كرامته مصانه هل كنا هنتردد أصلا قبل ما نروح؟؟؟ هل كان الطبيعي ان العساكر يطلعو من جوه عشان يضربونا و احنا ما عملناش أكتر من الهتاف؟؟؟...المظاهرة اللي ممكن تكون مقتتنع دلوقت تماما انها هبل اثبتت نقطة مهمة جدا لنا أولا (اللي راحو اتظاهرو) ثم للي عرف بتفاصيلها و هي ان الجيش و الشرطة العسكرية ما بيضربوش البلطجية  (ده اذا كانو بيضربوهم أصلا) ولا الشباب اللي بيحدف طوب أو مولوتوف بس لكن كمان المظاهرات السلمية اللي هي حق أصيل لأي مواطن في أي بلد فيها حد أدني من حقوق الانسان يعني باختصار أي واحد قرر انه يعترض بشكل علني هيتسحل...سلمي أو غير سلمي دي ما تفرقش معاهم خالص...يمكن كمان المظاهرة دي جاوبت بشكل قاطع علي السؤال اللي بعض الناس بتدعي انه مالوش اجابه...ايه اللي خلي الوضع ينفجر في شارع القصر العيني فجأه بعد ٢٧ يوم اعتصام هاديء أمام مجلس الوزراء؟؟؟

لو قعدنا نتنازل عن حقوقنا واحد ورا واحد مش هنرجع لأيام مبارك لإنها هتبقي حلم بعيد المنال و أيام هنا و سرور نترحم عليها...العساكر دول صنف تاني خالص...صنف معتبر البني آدمين في البلد دي حشرات ممكن يدوسو عليهم في أي وقت و في كل مناسبه و خصوصا بعد ما وصل بينا الحال لإن البنت اللي يهتك عرضها في الشارع في وضح النهار غلطانه عشان مالبستش طبقات كفاية تحت العبايه...يعني اللي كان كنبه أيام مبارك بقي إريال أيام المجلس العسكري...

و بالمناسبه دي أحب أوضح ان من حق أي بني آدم انه يعتصم في أي حته تعجبه و من حقه انه يتظاهر تظاهر سلمي و لو حد اعتدي عليه أثناء التظاهر السلمي من حقه يرد الاعتداء بالطريقه اللي يراها مناسبه و من حق أي بنت انها تلبس طبقه واحده من لبس محترم و تنزل بيه المظاهره و لو حد اعتدي عليها و الناس غلطتها يبقوا هما اللي محتاجين طبقات من تراب الأرض يروحو يندفنو تحتها عشان يدارو خزيهم....