اذا كنت نزلت معانا و اذا كنت ما نزلتش النهارده تعالي كده نشوف احنا كسبنا حاجه و لا هو وجع رجلين و نقحة في الشمس و خلاص؟؟
الحقيقة المكاسب بدأت من يوم الأربعاء بالإعلان الدستوري.... هو في حد ذاته مالوش أي علاقه بكلمة كسب في أي تصريف ليها انما هو الحراك للوضع الراكد... احساس المجلس العسكري ان الشارع لا زال ينبض بالثورة...بدليل التلات اربع بيانات اللي نزلو في يومين بعد غياب ٢٢ يوم....
و بعدين توالت الكروت اللي اترمت علي الترابيزه علشان تخلي الناس ما تنزلش الشارع أو علي الأقل تقلل شوية منهم...اشي قبول استقالة زكريا عزمي...تمهيدا لمحاكمته....ثم اللجنه اللي راحت الاتحاد الأوروبي علشان تبحث كيفية استرداد المليارات الطايره الحايره يمين و شمال...و الحته الكبيره... منع الثلاثي المرح من السفر و النظر في حساباتهم...
صدور قانون الأحزاب الجديد بعد طول انتظار...
صدور قانون الأحزاب الجديد بعد طول انتظار...
يحيي الجمل: البحث في آليات تصويت المصريين خارج مصر....
النهارده في التحرير ترددت أنباء عن بدء تشكيل هيئة محاكمة حسني مبارك برئاسة المستشار محمود خضيري !!!!!!!!... يا جماعه احنا كان أدامنا نص ساعه كمان و نحقق كل مطالب الثورة....
ترشيح حافظ الميرازي لرئاسة قطاع الأخبار بدلا من عبد اللطيف المناوي و جميلة اسماعيل لرئاسة التلفزيون.... داحنا لساننا اتدلدل من كتر ما قلنا الزفت المناوي ده لازم يغور...
ترشيح حافظ الميرازي لرئاسة قطاع الأخبار بدلا من عبد اللطيف المناوي و جميلة اسماعيل لرئاسة التلفزيون.... داحنا لساننا اتدلدل من كتر ما قلنا الزفت المناوي ده لازم يغور...
طبعا كل الكلام السابق ده يدخل تحت نطاق "كلام ابن عم حديت" زي اللي بنسمعه من أول تخلي الاستاذ المتخلي... طب أمال ايه اللي طلعنا بيه النهارده فعلا؟؟
أنا كنت واحد من الناس اللي كان ابتدي الشك يملاهم اننا ممكن نجمع الناس تاني و ننزلهم الشارع...النهارده أثبت شعب مصر انه متمسك بثورته و عارف انها غاليه أوي و عارف انها ما خلصتش و ان المسكنات مش نافعه و لازم الاستئصال...
في ناس أول مره تنزل مظاهرة كان النهارده يعني دماء الثورة اتجددت و في ناس كانت بتنزل ما نزلتش ... و موقفهم مش مفهوم انما براحتهم ... المهم بعد كده ما يرجعوش يقولو احنا نزلنا من أول الثورة لآخرها.... لا و كمان كانو هما المخططين اللي حمو الثورة و اكتر من كده .... يقعد أحد شخصياتهم البارزة في قعده المفروض انها رسمية نظرا للشخصيات اللي حاضره و يقول انا قائد ثورة ٢٥ يناير في أسيوط!!!!!!... النهارده الشارع أثبت ان الثورة مش هتقف علي حد....اللي عايز ينزل ده نازل علشان حقه و حق اخواته وولاده و وولاد بلده و اللي مش عايز براحته بس يسيبنا في حالنا و بندعوه انه يرجع ينزل معانا تاني لإنه ماخدش حقه و لو فاكر انه هياخده و هو قاعد في البيت يبقي غلطان...
احنا النهارده رسخنا مبدأ ان تخلي حسني مبارك لا يعني نهاية الثورة.... نهاية النظام الفاسد و محاكمة كل أفراده و بالذات اللي قتلو شهداءنا و عودة فلوسنا المنهوبة و ارساء مباديء الديموقراطية من حيث ضمانات الانتخابات...هي دي حدودنا و مطالبنا و ثورتنا مستمرة لغاية ما نحققها.
برضه من المكاسب المهمة جدا اننا حلقنا لقانون منع التظاهر ده و ثبتنا نقطة انه مالوش أي علاقة بمظاهرات ثورتنا يعني حتي لو ما اتلغاش... مش هيقضر حد بعد كده يقبض علي الناس اللي بتتظاهر يوم الجمعة علشان مطالب الثورة و خصوصا الناس اللي في ميدان التحرير.
برضه من المكاسب المهمة جدا اننا حلقنا لقانون منع التظاهر ده و ثبتنا نقطة انه مالوش أي علاقة بمظاهرات ثورتنا يعني حتي لو ما اتلغاش... مش هيقضر حد بعد كده يقبض علي الناس اللي بتتظاهر يوم الجمعة علشان مطالب الثورة و خصوصا الناس اللي في ميدان التحرير.
ناس كتير علقت علي قلة الأعداد... عايز اقوللهم ان يوم ٢٥ يناير كان اقل يوم من حيث الأعداد بس هو اليوم اللي ابتدت فيه حياتنا...يوم ميلادنا كلنا و ان شاء الله الأعداد هتزيد الجمعه الجايه و اللي بعدها و اللي بعدها... و دي دعوة مفتوحة للتظاهر بعد صلاة الجمعة كل أسبوع الي أن يقضي الله أمرا كان مفعولا...
أيادى مصرية سمرا.. ليها فى التمييز
ممدودة وسط الزئير.. تكسّر البراويز
سُطوع لصوت الجموع.. شوف مصر تحت الشمس
آن الأوان ترحلى.. يا دولة العواجيز!
****
عواجيز شداد.. مسعورين.. أكلوا بلادنا أكل
ويشبهوا بعضهم.. نهم.. وخِسّة وشكل
طلع الشباب البديع.. قلبوا خريفها ربيع
وحققوا المعجزة.. صحُّوا القتيل من القتل
****
إقتلنى.. قتلى.. ما حيعيد دولتك تانى
باكتب بدمى حياة تانية.. لأوطانى
دمى ده والاّ الربيع؟ لاتْنين بلون أخضر
وبابتسم.. من سعادتى والّا أحزانى؟
ليست هناك تعليقات:
إرسال تعليق