احساس صعب قوي لما تشوف منظر شاب بيتقتل برصاص الجيش بطلقة في دماغه واللي بينقله شخص بموتوسيكل وهو غرقان دم . مش عارف اوصف اللي حصل بس فظيع
لما تلاقي البلطجية اللي طالعين من مديرية امن الجيزة بيضربوا مع الشرطة الاول وبعد ما الجيش اتدخل بضرب الرصاص الحي الضرب فضل متواصل ساعتين
لما تشوف شاب صغير مسكوه البلطجية وقلعوه هدومة وضربوه لغايه لما اتعد من الضرب ونزلوا بشومه علي دماغه وكمان قالوا انا كان بيضرب علي الجيش طوب
احساس غبي جدا لما تبقي واقف زي حارس المرمي مستني القنابل المسيلة للدموع جايه من اي اتجاه وانت لابس ماسك الغاز والخوذه وجوانتي بتمسك القنابل
احساس اغبي لما ظابط ابن جزمة يستهدفك بقنبلة مباشرة في الرأس بس الخوذة تحميك وربك ستار
احساس غريب لما تلاقي الظابط نفسه بيتحرك قدامك وبتوعدك باشارات بايده وبيوجه قنبله تانيه مباشرة لمنطقة البطن بس ربك ستر اتحركت في وقتها
احساس غبي تاني لما الظابط يئس منك يطلع يهاجمك بالمدرعه ويقرب من الرصيف وانت بتجري عاوز يدهسك بس برضه معرفش لانه دخلت شارع جانبي
احساسي الان اني مضرب بخرطوش تاني في ركبتي اليمين وانا مصاب بخرطوش في الركبة الشمال من العباسية احساس بيض فشخ
امبارح شوفت رجالة واقفه بتحارب غطرسه الداخلية وشوفت ناس خافت من الموضوع وفضلت تتفرج
امبارح كان في ناس بتحافظ علي الامن ورفضت اي محاولات لتخريب الممتلكات واللهي العظيم رفضوا وقالوا لا مش هنخرب وده يثبت ان اللي ولع وحرق بلطجيه
شوفت قدامي بلطجيه وراء قوات الامن المركزي بيولعوا في حديقة الاورمان
شوفت ظباط الداخلية وهما كانوا بيشتمونا باوسخ الالفاظ علشان نحتك بيهم زيادة ونضربهم ردا علي الاهانات دي
شوفت ظابط الجيش وهوه بيبكي وبيقولنا ارجعوا هيدبحوكوا واللهي العظيم وهوه منهار ومش عارف يعمل اي شئ
شوفت نقيب الجيش وهوه بيقول احنا هنتفشخ احنا وانتم . احنا خوفنا علي الجيش من قنابل الغاز والمظلات والصاعقة ضربونا الصبح بالرصاص
شوفت عساكر الجيش اللي واقفين تحت السفارة وهما مش واخدين اي موقف من اقتحام السفارة . وبعد ما الشباب طلعوا قفلوا الباب عليهم علشان مينزلوش
مكناش خايفين لما دخلنا في الجراج بتاع عربيات في شارع جانبي واستخبنا فيه من ضرب النار المتواصل والاصابات والسايس بتاع الجراش غطي علينا
في قوة من الجيش سئلت علينا هل دخلنا الجراج ولا لا السايس قالهم محدش دخل هنا
بعدها وقفنا علي باب عمارة مع حارس الامن وقالنا انتم كأنكم معانا وقتها شوفت البلطجية بيدوراوا علي اي حد يضربوهكان واقف في الشارع
كنت حاسس اني بعمل شئ وانا بظهر علم مصر وهوه بيرفرف فوق السفارة الاسرائلية مع انهم كانوا طافيين النور بس انا كان معايا كشاف زينون كبير
اللي كانوا بيصوروا كان بيصورا وراء الداخلية علشان يعموا الناس عن الحقائق اللي بتعملها الداخلية .
الظابط بتاع الامن المركزي لما زهق مني بعت لي مصور صحفي فضل واقف جمبي ساعه عاوز ياخد لي صورة لوجهي علشان يعرف مين اللي لابس الماسك بس معرفش
كل شئ كان منظم ومرتب احنا لبسنا فعلا فخ من اكبر المهازل اللي حصلت لنا من اول الثورة
اللي بيفكر ان الداخلية اتعدلت وحالها بقي افضل يبقي بيضحك علي نفسه
في احداث العباسية الناس مكنتش خايفه من المواجهه مع الداخلية والبلطجيه . لكن في احداث شارع شارل ديجول الغاز كان بيضرب بكثافة وقنابل مجهولة
القنابل اللي انضربت انواع مختلفة قنابل مفيش عليها اي داتا تشير الي بلد المنشأ او تاريخ الانتاج .قنابل اشبه بقذائف الصاروخ الصغير معايا عينات
تعرفوا لو قلت اني اتشهدت كذا مرة وانا واقف وقلت يارب احنا بنغير شئ فاسد في البلد ونفسنا نصلحه يارب لو متنا اعتبرنا اي شئ غير اني نكون بلطجي
شوفت الشباب اللي بنقول عليهم متشردين او صيع واقفين صف اول في مواجهه مع بلطجية الداخلية وبيحاولوا يمنعوهم يتقدموا ويضربوا غاز بس كان عدد قليل
تعرفوا لو قولنا انه الشعب اللي بيشتم فينا دلوقتي وبيقول اننا بلطجية نزل وشاف اللي بيحصل بعنيه كان اول واحد شارك معانا في الاحداث
لو عاوز تحكم بجد علي اللي حصل امبارح قارن تصريح وزارة الداخلية بشهادتي وانت هتعرف الفرق واللهي بقول كلامي وانا ببكي حسرة علي اللي ماتوا
شوفت شباب علي موتسيكلات شغالين زي الاسعاف بينقولوا المصاببين بدون اي اجر او كلمة شكر حاسيين انه ده دورهم وواجبهم
شوفت عربية اسعاف مش عاوزه تاخد الناس المصابة والمسعف رفض انه يركب حد وياخده مستشفي علشان الناس قالت له عالجه هنا متسلمهوش للشرطة العسكرية
مهما يكون الشخص جبان لو شاف قدامه ناس بتطلب المساعده اكيد هيقدم اللي يقدر عليه
انا مش خايف اني اقول شهادتي علي الملأ او ان حد يعرف بياناتي لانه مؤمن بانه كل شئ نصيب واللي مكتوب هنشوفه اللي مزعلني انه في ناس لسه بتشكك
واللهي بكيت لما شوفت شكل الولد اللي كان شايل الشاب اللي مات وهوه والموتسيكل بتاعه غرقانين دم
انا هنشر كل الشهادة كاملة بكامل اللي شوفته بعيني مش اللي اتحكي لي او سمعته لانه مش هشهد الا علي شئ شوفته بعيني في احداث شارع الجيزة امس
كانت اسوء وافظع 12 ساعه متواصله عدت علي من وقت الثورة . امبارح كان اشبه بيوم 28 يناير جديد بكل مماراسات وزارة الداخليه
شوفت ناس كانت بتنهار من شده قنابل الغاز اللي كانت بتنضرب بكثافة والمدرعات اللي كانت بتدخل عاوزه تدهس الناس شئ صعب انك تسكت وتقول وانا مالي
انا كنت ببقي حاسس اني فشلت لو قنبلة غاز عدت مني ومقدرتش امسكها واحدفها كنت بحس بذنب انها عدت لاني معايا ماسك واللي ورايا بيتفشخوا من الغاز
دي صورة اللي نزلت في الاهرام انهرده وصورها المصور الفاشل بتاع الاهرام معرفش ينشر غيرها لانه معرفش ياخد صورة لوجهي 2.bp.blogspot.com/-mlLIoBK9VP0/T…
شوفت بلطجيه الجيش بيطبطب عليهم لم انصابوا علشان كانوا بيضربوا في صفه ضدنا بدون ما نعرف سبب لكده
انا مش مع عمر عفيفي ولا بفكر نفس تفكيره ويوم ما اتكلم قولت خليه يسكت مش ناقصه تنظير منه كفايه بقي كله بيتكلم ومحدش فاهم حاجه انا بقول شهادتي
لو الجيش اعلن الاحكام العرفية زي ما الناس خايفه هيضطر يلغي كل الاحكام المدنيه وبكده قضية مبارك هتبقي محاكمه عسكرية وده مش هيحصل ابدا
الجزيرة مقدرتش تنقل الصورة كامله ومباشرة من كل الاماكن الجزيرة كانت عند كوبري الجامعه شارع الجيزة او شارل ديجول كانت معركة شرسه بدون اي سبب
في حد معاه قنبله من القنابل اللي انضربت لسه منفجرتش هنوديها لمعمل كيميائي لتحليها علشان تبقي دليل اثبات في انها استخدمت في الاحداث
تعرف لما تشوف صاحبك بيبكي جمبك وهوه كل اصرار انه يكمل وميمشيش من المكان رد فعلك هيكون ايه . مقدرتش اسيبه واورح مع انه كان في امكاني امشي
انا هكتب كل شئ تاني بس انا مكنتش قادر اتكلم من امبارح حاسس انه نفسيا بعد اللي شفته انه الايام اللي جايه صعبه بس عاوزه الصبر علشان نحقق شئ
شارع البحر كان في دوريات تمشيط علشان عربيات الجيش اللي جايبه القوات وكان اي حد بيطلع هناك بيتمسك اللي هوه الشارع الموازي لشارل ديجول
انا مصور فوتوغرافي وبصور فيديو كويس كان اسهل شئ اخد الكاميرا واكتفي اني اصور قولت اليوم ده مش للتصوير اليوم ده اكيد هتحصل مواجهه مش هقف ساكت
هاقول لكم شئ يمكن تسئلوني اخدت ليه كشاف زينون معايا وماسك غاز وخوذة كنت في التحرير وكنت متوقع يطفوا علينا النور ويضربونا بالغاز
امي كانت بتكلمني وبتقولي انت فين اضطريت اقولها انا في اي مكان تاني وانا مرمي علي الارض عند الفور سيزون بعد ما انضربت بخرطوش كنت خايف عليها
كان معايا 3 من اصحابي ممكن تسئلوهم لومش مصدقين كلامي هيقولوا حاجات تاني شافوها بعنيهم @Elmolatham @ScafVirginity بيحكوا اللي حصل معاهم
سؤال لنفسي ليه كل مرة انضرب بخرطوش في رجلي افضل مكمل في المواجهات حتي بعد ما اصيبت بلاقي الاجابة احنا لوعلي باطل ربنا كان هيزرع الخوف فينا
كل ما بسمع اغنية تامر عاشور سئلوا الشهيد نفسك في ايه بيبقي نفسي اجيب حقهم وارفع من شان البلد دي ونضفها من الخونه والعملاء اللي فيها
عاوز اقولكم كلمة اخيرة مش تحريض متخافش لو انت علي الحق ربنا هينصرك مهما كان والعمر واحد والرب واحد وكل شئ مقدر ليك اكيد هتشوفه
خلي عندك هدف وخلي حبك للبلد دي وحبك انك تطهرها من الفساد اللي كان فيها مده 30 سنه يبقي هوه اللي جواك هتعرف انت رايح فين
اوعي تشوف الحق والباطل قدامك وتقف علي الحياد لانك هتبقي منافق وبتساند الباطل حدد لنفسك لاما مع الحق لاما مع الباطل
في بنت اسمها مني سيف ماسكه مجموعة لا للمحاكمات العسكرية للمدنيين احب اشكرها لانها كانت متابعه معايا علي التليفون وقت ما كنت في الجراج مستخبي
مني سيف بجد انتي بنت مصرية جدعه جدا جدا واشكرك علي موقفك ومتابعتك ليا في وقت صعب @Monasosh
لما بلاقي مقاله طويله مش بقدر أكملها لأخرها - لكن كلامك لمس قلبي وصدقتك كل كلمه قلتها وقلت ياريت كنت معاكم - ربنا يحميكم لمصر يا شباب تفرح القلب الحزين -وعلي رأي فرقة اسكندريلا مين اللي يقدر يوم يسجن مصر
ردحذفبرغم تصديقي لهذه الرواية .. الا ان تاجيج المشاعر سيؤدي الي مواجهة في ظل غياب اعلام محايد و السيطرة علي الاعلام الفاسد .. سيظهر من خلالها ان الثوار و الثورة بلطجية .. يجب ان نفوت عليهم الفرصة و نتركهم يندفعوا الي الفخ الذي يجهزوه للثورة .. احيانا الصمت السلبية قد تكون سلاح فتاك اذا استعمل في الوقت الصحيح
ردحذفوانتم ايه اللى وداكم من الأساس بعد التحرير لأماكن هى مظان احتكاك زى مديرية الأمن والسفارة وانتم عارفين السيناريو المتوقع فى حين كان الأفضل والأسلم لتبقى ثورتنا منارة يستهدى بها هى الانصراف بعد الإعلان عن انتهاء فعاليات اليوم وبعد ما الرسالة وصلت لمجلس مبارك بقوة ... بتحكى اللى عملته وكأنك بطل فى حين أن تجنب الاحتكاك هو عين الصواب وليس الاحتكاك بتوابعه المنظورة الآن
ردحذفيا بنى انت باندفاعك وسذاجتك انت واللى كانوا معاك كنتم أداة بدون قصد وعن حسن نية فى لعبة رسم خطوطها مجلس العار ... ماسألتش نفسك ليه ماتحركتش القوة الضاربة للجيش والشرطة لحماية السفارة إلا الساعة واحدة بالليل بعد اقتحام السفارة فى حين إن بدأ تكسير السور من الساعة 5 مساءا فضلا عن ان المتظاهرين كانوا رايحين التحرير أصلا من الصبح بالشواكيش ومعرف هيعملوا بيها ايه ومع ذلك لم يسعى الجيش لاستباق ذهابكم بإرسال جنود لحماية السفارة ... ده يا محترم معناه ان ما حدث تم بمباركة المجلس العسكرى لتحقيق عدد من النتائج المترتبة على الحدث لا يستفيد منها سوى المجلس وهى :
1-- تفعيل قانون الطوارىء لتكبيل أى تحرك سياسي بعد ذلك
2-صرف النظر عن جمعة تصحيح المسار والتى كانت تطالبهم بسرعة تسليم السلطة
3-اشعار الشعب بأن هناك فوضى و انفلات أمنى وبالتالى يتم تأجيل الانتخابات
4-جعل مصر مخطئة فى حق إسرائيل .. وبالتالى تكف المطالبة عن باعتذارها وأيضا عدم الاقتراب منن كامب ديفيد
5-استغلال الفوضى لحرق مبنى الأدلة الجنائية من الداخل وشوف بقى أدلة ايه اللى اتحرقت ... وسمعنى سلام الوطنية يا حمش انت واللى زيك
وعليه فيتضح أن ماحدث كان بمباركة المجلس العسكرى ليتم تفعيل قانون الطوارىء والتى تجلت بوادر تفعيله فيما حدث اليوم مع قناة الجزيرة مباشر مصر
شفت بقى يا حلوة نتيجة اندفاعك وحماستك الغير مسئولة انت واللى معاك عملتم ايه ؟
يارب تفهموا بقى وماتستدرجوش لتصرفات ظاهرها فيها الرحمة وباطنها من قبلها العذاب ...
ليه البلوجرز حتى ما بيحاولوش يوثقوا كلامهم بصور - التوثيق هو طريقك للانتشار و احترام الناس
ردحذفالله يحرق الداخلية على المجلس العسكري
ردحذفولا يحيق المكر السيئ إلا بأهله
ردحذفhttp://nasefkaf.blogspot.com/2011/09/blog-post_11.htmlده تعليقي يا ريت نبطل خيبة ونفهم ايه المخطط الحقيقي ومين وراه ولصالح مين الناس دي ما بتلعبش وسابوا الاعلام للديوك اللي بتكاكي وبتتنازع على الغنائم ودخلوا غرفة جهنم يرصدوا النمبالغ ويرسموا الخطط اولا ليفلتوا من القضايا اللي ضدهم وثانيا علشان يخربوا البلد
ردحذفمعرفش ليه مش عارف اصدقك ...بس ما علينا ...حضرتك اصلاااا ايه اللي يوديك هناك هما مش سابولكم التحرير عشان تعبروا فيه عن مطالبكم ايه الحكمة بقى من انك تروح وتحتك بيهم هناااك !!!!!!!!!!!!!...حرااام عليكم البلد .....بس بجد شـــابو لمؤلف الرواية دي
ردحذفكلام فاضي ، سلملي علي عفيفي اللي عمال يشحنكم من اسبوعين فاتوا ، عموما في رب اسمه العدل
ردحذف" اللهم اهلك الظالمين بالظالمين و اخرجنا من بينهم سالمين " امين
مقاله طويله لكن مقدرتش مكملهاش ، كل كلمه فيها كأن ربنا مغلفها بالصدق متقدرش تكدبها مهما كان توجهك ، وأنا بقرا المقاله حاسس بنغصه في قلبي للدرجه دي في ضباط شرطه أو جيش قلبهم فيه شر أو ضميرهم ميت ؟! وللدرجه دي في شباب مصري بيقاوم ويواجه ومقتنع بالي بيعمله مهما إتصاب أو حتى مات مع إنه ما أسهل إنه يعمل زي كده ويقول أنا مقدرشي أعمل حاجه ويخليه في حاله ويتفرج من بعيد ؟! يارب أنصر الخير على الشر يا رب إحنا جايز منستاهلش لكن لو فيه شباب زي كده في مصر يبقى مصر تستاهل كل خير
ردحذفالحل اننا نصبر لحد الانتخابات هتقول هتتزو ممكن يحصل بس ساعتها المصريين كلهم هيبقوا ضد المجلس العسكري وهنعمل فيه اللي اتعمل في مبارك
ردحذفاشكرك على شهادتك انا حسيت وانا بقراء الكلام ان انا الى بتكلم لانى كنت معاك هناك وشفت كل الى انت كتبته وشفت الاحداث بعينى والله واعلم اذا كنت شفتك ولا ما شفتكش او كنت ساعدتك لما اتخنقت من الغاز ولا انت ساعدتنى او ساعدت صاحبى يعنى بمعنى اصح ان والله ما كانش فى حاجة منظمة ولا مدبرة الشباب انضم لبعض من غير ما نعرف بعض ولا من غير ما حد يقولنا اعملو كدا طب كان سهل اووووى اننا نروح وخلاص انما احنا شفنا ان الشرطة زى يوم 28 يناير بالظبط يعنى انا غاوى اشم غاز انا كل الى حزنت منه انى لما روحت البيت لاقيت ان احنا الى بلطجية ان يا عينى الشرطة مظلومة وغلابة واحنا الى اتعدينا عليهم!!والى زعلنى كمان ان الثوار يقولو علينا ابناء مبارك او فلول او دول ثورة مضادة علشان ينفو التهمه عن نفسهم الى هيا مش تهمه اصلا!!ده كان دفاع عن النفس وعن كل الى كانو موجودين والى يقول ان مافيش قناصة فى الشرطة امال مين الى كان بيضرب نار وبينشن على اللوحات الاعلانية وعواميد النور وطبعا فى 3 ماتو بطلق ناررى منهم واحد مذكور انو مقذوف ناارررى قوووى يعنى يا رشاش يا قناصة .
ردحذفاى واحد مارحش التحرير مش هيصدق كلامك (خاصة اعضاء اللجنة الالكترونية - والسلبيين و- والجبناء -واللى بيصدقوا التليفزيون ) انا بطلت اصدق اى كلام بيقوله الاعلام......... اى شاب او مواطن محترم عايز يلاقى اجابة مابتنزلش عليه من السما او من الكباااااار ينزل يسأل الناس بنفسه ومايعملش فيها برم وانه فاهم كل حاجة (فكر فى احتمال بسيط انك مخدووع ولو 1 فى المية ) الناس راحت عند السفارة 3 مرات لغاية دلوقت --------اول مرة ساعة الانتفاضة الفلسطينية وانا كنت ضد الموضوع دا وقلت فى ناس هتجرنا لحرب وهمية بس شهادة اصدقاء ليا ان الجيش تعامل معهم بمنتهى العنف وسلمهم تسليم اهالى لمدير امن الجيزة (لاشين اللى بيتحاكم عن قتل المتظاهرين فى القليوبية يعنى واخد ترقية من القليوبية للجيزة )ودحضحوهم ضرب وكان فى رصاص حى ........... تانى مرة فى رمضان بعد مقتل جنودنا على الحدود لما لاقوا ان فى توجه شعبى كبيييييير سابو الشحات ينزل العلم عشان يمتصوا غضب الناس المرة الاخيرة دى كانت الاعداد اقل من المرة التانية (اى كان اختلافك مع انهم يرحوا او لا مع العلم انهم رفعوا العلم والنهار طالع //// والضرلاب كان بليل بعد 11) المهم كان فى كمين لانى وانا رايح لاقيت حوالى 30-40 عربية امن مركزى ورا جنينة الحيوان والمدرعات فى ناحية تانية يعنى كمين كمين المهم البرم اللى عارف ان كل دا كان هيحصل ما نزلش ليه وماحذرش ليه ----------- واخيرا اللى حصل حصل فلازم كل محترم وبيحب الخير لبلده اى كان اختلاف توجهنا لازم ندعوا كل المصريين ما يرضخوش لارادة المجلس وسيناريوهاته ويرجعوا رجالة مع بعض زى الاول
ردحذففعلا وهو ده الى بيحصل لما تكون على الحق ربنا بيكون معاك واللى بيقولوا ايه اللى وداكم حوالين السفاره فيه جندى مات من السته الى اتضربوا على الحدود بدم بارد من الاسرائيلين يعنى برضه رساله من ربنا ان الشباب الثائر على الحق
ردحذفنواره نجم النهارده كتبت جزء من البلوج بتاعتك دى فى جرنال التحرير http://tahrirnews.com/%D9%85%D9%82%D8%A7%D9%84%D8%A7%D8%AA/%D8%A3%D9%84%D9%81%D8%A7%D8%B5-%D8%A8%D8%B3%D9%8A%D8%A6%D8%A9/
ردحذفكلامك خطير جدا !!! كلامك ببساطه معناه ان انا حمار
ردحذف