لو أنك من المتعصبين دينيا فأرجو أن تنحي هذا التعصب جانبا لدقائق معدودة...لو أنك من المؤمنين بفكرة أن الجيش هو صمام الأمان الوحيد لهذا البلد و عليه فإنك علي استعداد للتجاوز عن أفعاله مهما كانت..من فضلك نحي مخاوفك جانبا و أنت تقرأ ما يلي من أجل الوصول إلي الحقيقة...
تأخرت كثيرا قبل أن أكتب هذا المقال...أخرتني الصدمة و أخرني الحزن ...كما أخرتني كمية الشهادات التي قرأتها عن شهود عيان و
بالرغم من أنها كانت أكثر من كافية الا إني رأيت أن هذا المقال لو نجح في الوصول لشخص واحد فقط لا يعلم حقيقة ما جري فقد نجح....
بداية القصة ليست في القاهرة..البداية في إدفو..أحد مراكز محافظة أسوان... الروايات كثيرة لكن المختصر المفيد أنه كان هناك نزاع علي مكان اقامة شعائر هل هو كنيسة أم منزل تحول الي كنيسة؟؟ و لنفترض انه منزل تحول الي كنيسة... كيف يمكن أن يحدث ما حدث؟؟؟ كيف يترك الوضع للناس يسوون خلافاتهم كما يرون بدون أي قانون أو قوة لتنفيذ هذا القانون؟؟؟ أي شريعة غاب تحكم هذا البلد؟؟؟ أولا تم اتفاق صلح غريب نتيجته أن هذا المكان غبر مسموح له بوضع أي شعارات أو رفع أي أصوات تدل علي أنه كنيسة و قد قبل الجانب المسيحي تلك الشروط !!!!!! ثم بعد اسبوع يحرق المكان بتحريض من شخصيات دينية في البلد؟؟؟؟ هل هذا هو ما أمر به محمد عليه الصلاة و السلام؟؟؟ هل جاء هذا في القرآن؟؟؟ لعنة الله علي المدلسين باسم الإسلام في كل عصر....
بالطبع كان لا بد للإخوة المسيحيين أن يغضبوا لما حدث و ابسط حقوق الغاضب في البلاد الحرة أن يعبر عن غضبه بمظاهرة و هذه ليست المرة الأولي...و كم من مظاهرات للإخوة الأقباط مرت بسلام دون أن يصاب فرد واحد بخدش بل كذلك كانت اعتصاماتهم عند ماسبيرو سابقا...بل ان نظام مبارك لم يجرؤ علي التعرض لمظاهرات الاقباط و ذلك حتي لا يعكر صفو علاقته بسيدته أمريكا...
المظاهرات بدأت زي أي مظاهرات في البلد من يوم 25 يناير...مظاهرات سلمية لو تركت لحالها لانفضت من تعب السير و الهتاف... لكن اذا كان في طرف عايز يستغل الموقف لصالحه و يضرب كام عصفور بحجر واحد (أو برصاصة واحده) يبقي ليه لأ؟؟؟ هو لو البلد ولعت و الطواريء رجعت و جابت في إيدها حظر التجول و المواطن بقي خايف ينزل الشارع إيه اللي هيحصل؟؟؟ مين اللي هيستفيد؟؟ ايه العبط ده؟؟؟ في حد ممكن يستفيد م الهم ده؟؟ (ده ممكن يكون تفكير حضرتك دلوقت) أقوللك قبل ما تقفل الصفحة و تبطل قرايه ان بالفعل انتخابات نقابة المحامين اتأجلت....واخد بالك من موضوع انتخابات دي؟؟؟ يا تري في انتخابات ايه تاني جايه و احنا بنحارب عشان نوصللها؟؟؟؟ ايه رأيك ف مجلس الشعب؟؟؟ لو اتأخرت انتخابات مجلس شعب يبقي ايه؟؟؟ مافيش دستور...يعني إيه؟؟ يعني مافيش انتخابات رئاسية و ده يفيد مين في إيه؟؟؟ يفيد اللي هو رئيس دلوقت....قصدك مين يعني؟؟؟؟ قول انت بقي.... أيون برافو عليك المجلس العسكريييييي تماااام....
ثورتنا بتتسرق يا أساتذة.... يمكن حضرتك مش مقتنع و لسه بتهتف الجيش و الشعب إيد ماعرفش إيه و القصص دي....بص يا عم القطنة ما بتكدبش....اتفرج سعادتك ع الكام صورة ع الكام فيديو اللي جايين ع الكام لينك لشهادات ناس حضرت الواقعه و بغض النظر انت مصدقهم ولا لأ كأشخاص شوف الأحداث مترتبه ازاي في كلامهم من غير سابق اتفاق ولا معرفة
الحكايه في كام كلمه...الأقباط نزلو مظاهرات و معاهم مسلمين...بدأت تحرشات بالمظاهرة في أماكن متفرقة في القللي و عابدين و عند كوبري أكتوبر...في ناس افتكرت انها معركه بين مسلمين و مسيحيين و نزلت في جانب من الاتنين....لما لقيو ظباط جيش بينظمو صفوف البلطجية اللي بيضربو المظاهرة و يقولو اسلامية انضمو للمظاهرة و هتفو مسلم و مسيحي إيد واحدة...الجيش استغل الهرج اللي حصل و ضرب نار و مدرعاته دهست المتظاهرين....حتي الشرطة لم تتدخل...لم تمارس هوايتها المفضلة في ضرب خلق الله و لأول مره لم يدعي أي طرف عليها أنها كان لها علاقة مباشرة بالأحداث.
 |
| مايكل نبيل مع خطيبته قبل و بعد تدخل الجيش في حياته |
بثينة كامل : لدي فيديو يثبت أن الأقباط كانوا سلميين وأن الجيش من بدأ بالعنف ،ضابط جيش أخبرني أن الأوامر صدرت بإطلاق النار ٦ مساء.
شهادة هاني بشري من موقع الأحداث علي الفيسبوك
شهادة ستيف نبيل
شهادة خالد عبد الناصر
كلمة أخيرة...هو احنا هنفضل لغاية امتي نصدق القناه الأولي و الفضائية المصرية؟؟ هو احنا ما اتعلمناش أي حاجه من سنة 67 لغاية دلوقت؟؟؟
