ناس كتير كانت ولا زالت بتسأل نفسها...هي البلد دي مودييانا علي فين و عايزه مننا إيه؟؟ و لو حد منهم فتحلك قلبه و فضفضلك زي ما بيحصل دلوقت كتير في التاكسي و عند الحلاق و البقال و الخضراتي هتسمع كلام من عينة احنا كنا قبل الثورة زفت و دلوقت ازفت... الله يلعن أبو الثورة اللي وقفت حالنا...احنا كنا مسروقين و منهوبين بس اهي كانت أيام و بنعيشها انما اللي بيحصل ده خراب... و لو كانت المناقشه مع ناس جامعيين و مهنيين هتبقي عن الأمن و إن فين مكتسبات الثورة دي؟؟ احنا ماخدناش حاجه و البلطجيه ماليين البلد و الناس بقو قللات الأدب و بعدين ايه اللي استجد يعني...صحيح النظام سقط لكن اللي مربيهم النظام لسه معششين في كل خن في البلد و عمر الفلوس اللي اتنهبت ما هترجع و اقتصاد البلد خرب و احنا مش هنلاقي ناكل بعد شويه و الثوره دي كل من هب و دب ركب علي كتافها و عامل وطني....
طيب... احنا محتاجين نعرف حاجه مهمة جدا.... ان الثورات عمرها ما كانت زرار تدوس عليه يحول البلد لجنة علي الأرض و يرجع المنهوب و يسجن الحرامي و يصرف للناس فلوس بالملايين...الثورة نقطة نظام بتهد عهد قديم و "تسمح" ببناء جديد يعني بتجيب البلد علي المحارة و اتفضل يا شعب ورينا ابداعاتك.... يعني البلد كانت بتقع في بئر مالوش قرار و كل يوم في النازل... كل يوم أوطي من اللي قبله....الثورة ما طلعتش البلد من البئر ده انما وقفتها عند نقطه معينه بطلت نزول و ممكن تبدأ تطلع لفوق...يعني الثورة سلمت الشعب ده البلد عجينه و هو و شطارته...العجينه دي ممكن تبقي رغيف عيش محروق و ممكن تبقي كيكه تتمني تدوقها و تاخد نصيبك...
كمان محتاجين نعرف ان عدم استقرار الاقتصاد و كمان موضوع المشاكل الأمنيه و حتي زهق الناس في عيشيتها بعد الثورة كل ده من خصائص مرحلة التحول اللي احنا فيها دي .... عادي يعني و حصل بعد أي ثورة حصلت في العالم احنا مش بدعه يعني و لا ثورتنا فشلت ولا حاجه دي مرحله طبيعية جدا...كمان معلش احنا مضطرين إن الناس اللي بتحلم بنصيبها في فلوس مبارك عدا و نقدا يفوقوا من أحلامهم لإن عمر الثورة ما كان ده هدفها في أي مكان في العالم.... أما بالنسبه للي مش عاجبه الكم الهائل من الأحزاب و الجمعيات و الأفكار و الائتلافات و خلافه برضه عايزينه يطمئن ان حالة السيولة السياسية دي برضه عادية بعد الكبت اللي الناس عانت منه و بعد شويه الأحزاب دي و الائتلافات و كل الحبشتكانات دي هترسي علي خمس ست آحزاب و دمتم...
يعني من الآخر لو انت بتسأل إيه اللي زاد عليا هاقوللك انك زاد عليك انك بقيت صاحب بلد بعد ما كنت عامل تراحيل في عزبة مبارك و اللي خلاك صاحب بلد الإيجابيه و التضحيه من الناس اللي نزلت الشارع... و ده دورك علشان انت كمان تبقي ايجابي سواء كنت شاركت في الثورة يبقي لازم تفضل ايجابي تجاه كل شئون البلد أو لو ما شاركتش يبقي دورك بدأ من دلوقت و لازم تبقي عارف ان دورك ما يقلش عن الناس اللي نزلت الشارع و برضه لازم تبقي عارف ان مافيش اطباق ولا ملاعق فضة في الموضوع انت بتبني بلد ليك ولأولادك يعني هتشتغل في الفاعل...بس هتلاقي نتيجه....
السؤال المنطقي و اللي المفروض نسأله لنفسنا بجد: البلد دي عايزه مننا ايه علشان تبقي زي ماحنا عايزينها؟؟.... زي ماقلنا البلد عايزاك ايجابي...خلاص مافيش حاجه اسمها ماليش دعوه...لأ ليك دعوه بكل حاجه بتحصل في البلد و كل حاجه في البلد شأنك الخاص...انت راجل صاحب ملك دلوقت...بس خد بالك في الظروف اللي احنا فيها دي ..في خيط رفيع بين الايجابيه و الفوضويه...يعني لما أعمل ممظاهرة علشان مطالب الثورة متعطلة دي إيجابيه إنما لو عملت مظاهرة علشان كلية التمريض يبقي اسمها كلية الطب الإداري...دي اسمحلي فوضي بقرون كمان...عارفين ان كلنا عندنا مشاكل في أشغالنا ...كلنا مرتباتنا متدنية و كلنا بشكل أو بآخر ممكن نكون معترضين علي جزء من أو كل الهيكل الإداري لأعمالنا إنما عايزين نتفق إن الدنيا كلها أولويات يعني أنا لما كنت باشتغل عند حسني مبارك علشان خايف من الأمن أكمل جميلي و أشتغل في ملكي و ملك ولادي شويه لغاية ما البلد تقوم علي رجليها و بعدين أطالب باللي أنا عايزه... ده مش معناه اننا نصبر علي مدير فاسد أو نتستر عليه لكن كشف الفساد شيء و تعطيل العمل شيء تاني...يعني اتحرك بس فكر قبل ما تتحرك...دي مصلحة عامه ولا خاصه؟؟ و لو مصلحه عامه هل في ضرر هيقع علي البلد من تحركي ده و هل الضرر ده يوازي المصلحه ولا أكبر ولا أقل؟؟ و بعدين طبعا ما ينفعش تقول ان ايه يعني لما الشغل في الحته دي يتعطل يعني البلد هتقف علينا؟؟؟ أيوه البلد هتقف لإن في ناس في أماكن تانيه ومجالات تانيه هتعمل زيك و لإن انت حلقه في سلسلة مش عايش لوحدك في الفراغ...
مش بس كده... احنا محتاجين جديد في بلدنا علشان نتوسع في التنمية و نخرج من زحام الوادي و نأمن مستقبل البلد مع النمو الطبيعي في السكان اللي كانو ذالين أبداننا بيه ...الحاجات اللي كنا كلنا نفضنالها علي أساس انها أحلام فضائيه لازم نرجع نفكر فيها زي الصحرا و طاقة الرياح و الحفاظ علي البيئة و تعديل صرف النيل في البحر...كل خبراء العالم أكدو ان الحاجات دي كلها ليها مستقبل في مصر بس عزبة مبارك مكانش ليها نفس...
كلنا لازم نشارك في سياسة البلد و اختيار الناس اللي هتمشيها علشان كده لازم تقرا عن المفاهيم السياسية البسيطه علشان ما يبقاش الليبرالي كافر و العلماني كافر... لازم تقرا في سياسة الاسلام علشان مش أي واحد يقوللك هو ده الدين تقول آمين....كل مرشح في أي حته انشاالله مجلس ادارة نادي رياضي لازم يكون له برنامج واضح ترضي عنه و يحقق طموحك مش تروح تنتخبه لإنه صاحبك أو قريبك أو بلديات... و الكلام اللي تسمعه عن أي مرشح لازم تتحقق منه ..سيبك بقي من قصة ده عميل و ده زنديق و ده خالته يهوديه....
لازم كلنا نهتم بأخبار البلد...انشر الخبر المؤكد و ابعد عن الشائعات و شارك في تكذيبها... الخبر لازمه مصدر واضح...
فكر كويس في الكلمه اللي بتطلع من بقك... ممكن تعمل مصايب حتي النكت اللي بتقولها قدام عيالك ممكن تشكل شخصيتهم....ممكن تخليهم متطرفين و كارهين للآخر...اتعود انك ما تصنفش الناس و سيبك من فلان ده تبع مين ولا الحزب ده مين اللي مأسسه...خليك في فكره ايه؟؟...
الكلام ده أنا باقوله لنفسي أول واحد لأنني محتاج حد يفكرني بيه... صحيح مش محتاج حد يفكرني ان البلد بلدي و اني لازم اساعد في بنائها انما محتاج اللي يشجعني كل شويه و يقوللي هانت و يقوللي كتر خيرك ...اللي انت عملته فرق...
