غزوة الصناديق...الخدعة الكبري

قاللك إلحق يا معلم الاستفتاء علي التعديلات الدستورية اللي هيحدد مصير البلد في الفترة القادمة يوم ١٩ مارس..... ليه القفش يا عم الحاج؟؟ احنا مستعجلين علي ايه؟؟؟ لا ده تمام كده احنا ادينا فرصة كبيييييرة علشان الشعب كله يناقش التعديلات.....اديناكم خمستااااااااااشر يوم انتو هتنهبو؟؟؟ يا عم ٨٥ مليون هيناقشوالتعديلات في خمستاشر يوم انتو هتشتغلونا؟؟ ... ده مش بس الشعب ناقش التعديلات ده فهمها كمان.... احنا شعب يفهمها و هي طايره مالكوش دعوة انتو بطلو تتهمو الشعب بالجهل هو انتم أوصيا علي مخ الشعب؟؟ و بعدين الاشراف القضائي جاهز و تمام التمام عايزين ايه تاني هه؟...طيب يا عم طالما الشعب فهم يبقي خير...

بدون أي مناسبة و بدون أي سبب واضح أصبحت التعديلات الدستورية في الأسبوع السابق للاستفتاء قضية دينية بحتة!!!!! خير يا جماعة؟؟؟ مش هو الاستفتاء ده علي التمن مواد اللي اتعدلو و الماده اللي اتلغت برضه ولا في حاجه تانيه احنا مش واخدين بالنا منها؟؟؟؟... ليه فجأه بقو اللي بيتكلمو عن التعديلات مشايخ و قسيس؟؟ و بعدين بقت الحكاية انت مع مين في دول؟؟؟ ايه هو ده؟؟؟ مع مين في ايه؟؟؟؟ يا اخواننا دي مواد في انتخاب رئيس و عمل دستور جديد مش دين جديد..... في ايه؟؟؟؟ ماحدش بيفتح بقه ليه الا رجال الدين و اللي بيتكلم من براهم بيقول مش مهم النتيجة المهم الممارسة الديموقراطية.... ماشي بس مش نبقي فاهمين احنا رايحين نمارس الديموقراطية في ايه الأول؟؟؟؟

عموما مافيش مشاكل... من حق كل واحد انه يتكلم في أي قضية عامة و يقول رأيه بما إننا بقينا في بلد ديموقراطي...انما لما اكون رمز...لازم برضه أؤكد علي الناس اللي ممكن تتأثر برأيي ان دي حرية شخصية و كل واحد حر في رأيه و لما أكون رمز ديني أعتقد ان لما تكون القضية اللي باتكلم فيها مش قضية دينية لازم برضه أوضح النقطة دي...ان رأيي مش فتوي.... علشان نتفادي موقف زي اللي حصل في أسيوط يوم الخميس ١٧-٣ من مصادمات بين الناس اللي بتوزع منشورات.... أحد الشباب الذي تبدو عليه ملامح الالتزام الديني شوهد و هو يمزق ملصقات فأراد البعض اقامة حوار معه للوقوف علي أسباب ذلك.... كان رده انه كان عايز حد يتعرضله و إنه فتح مطوه علي شاب كان بيعلق ملصقات لا ففر هاربا.... ده مش موقف عام بس حصل و في المقابل كان في شباب في منتهي اللطف و تبادلو المنشورات بابتسامه و ما حصلتش بينهم أي مشاكل.... انما تدخل رجال الدين بشكل ما كان هيمنع كل الصدامات دي من بابها طالما انهم أرادو أن يكونو طرف في الموضوع...

المشكلة فعلا اللي خلت الواحد مش مصدق ان ده بيحصل هي خطبة الجمعة..... ايه اللي خلي خطبة الجمعة تتحول الي دعاية لرأي معين في التعديلات الدستورية؟؟؟ أنا مريت علي تلات مساجد أحدهم اللي صليت فيه... التلاته بيتكلمو عن الاستفتاء و ان الناس لازم تروح تقول نعم!!!! في المسجد اللي صليت فيه الخطبة لم يكن لها صلة من قريب أو بعيد بالاستفتاء.... و فجأة و عندما شارفت علي الانتهاء بدأ الشيخ يذكر الناس أن عليهم أمانة و أن المهم أن يذهب المرء و يدلي بصوته سواء نعم أو لا.....طيب عظيم...عداك العيب يا عم الشيخ.....و لكن نعم الأقرب إلي الاستقرار و لدفع عجلة التنمية... أما الذين يقولون لا إنما يتخوفون من وصول الإخوان المسلمين إلي الحكم و قيام الدولة الإسلامية... و ماذا أخذنا من الملاحدة و العلمانيين؟؟؟....... في لحظة واحده نص اللي قاعدين في الجامع بقو ملاحدة و علمانيين.... بعد الصلاة أراد شيخ آخر أن يستمر في النصح و لكن بعض المصلين لم يسمحو له بذلك و قعدو يناقشوه بدعوي ان ده رأي شخصي لا يجب فرضه علي المصلين كجزء من خطبة الجمعة من علي منبر رسول الله و هو يقوللهم ما ينفعش تناقش الخطيب أثناء خطبة الجمعة!!!!

علي مستوي الإشراف القضائي...كانت محكمة أسيوط يوم الجمعة خلية نحل من كتر المستشارين ووكلاء النيابة الساعين لمعرفة ايه النظام بالظبط؟؟ ماحدش عارف لجنته فين و لا هيروح ازاي و لا استلمو الورق بتاع الاستفتا و لا حتي عارفين شكله...... مجموعة كبيرة جدا من الميكروباصات اصطفت أمام المحكمة و كل وكيل نيابة المفروض انه ينزل يبحث عن الميكروباص اللي هيروح به اللجنه بل أكثر من ذلك...بعض السادة المستشارين اضطر ينزل يسأل سائقي الميكروباص علي الكشوفات اللي فيها أسماء المستشارين علشان يعرف رقم لجنته و مكانها.... برضه ليه نزنق الناس في الوقت و نكروتهم؟؟ مافيش اجابه علي هذا السؤال!!! و النتيجة بانت يوم الاستفتاء.... العديد من اللجان بدأت بدون اشراف قضائي و تأخر وصول عضو اللجنه القضائي في بعض الحالات خصوصا في مركز القوصية بأسيوط و مراكز متعددة في محافظة قنا حتي الساعة الرابعة عصرا!!! طب ليه ما اديش الناس دي فرصة تنظم المسألة براحتها....تاني..... هو احنا مستعجلين علي ايه؟؟؟؟ هو مين اللي بيجري ورانا؟؟؟ 

استمر مسلسل الشحن الديني يوم الاستفتاء خصوصا في القري و المناطق الشعبية ...جوامع عماله تنادي علي الناس في الميكروفون علشان ينزلو للواجب المقدس يقولو نعم علشان يحمو الإسلام..... ناس واقفة عند اللجان تقوللك راجع نفسك يا أخي.... يا أختي انتي مع مين؟؟؟....بعض الاحتكاكات و الجيش يقبض علي عدد محدود...مش بس كده في ناس بقي اصطادت صيد في الميه العكره بعمرهم كله.... واحد حزب وطني معروف جدا من غير أي اتهامات ولا فلول و لا كلام من ده ماشي بعربيه هيونداي فيرنا فيراني و علي الكبوت بتاعها بوستر قاااااااد كده بيقول لا للتعديلات الدستورية.... عمال يقف عند كل لجنه و يفتعل خلافات مع الشباب السلفي و ينزل في الشارع يعمل مجنون و يقول حسبي الله و نعم الوكيل لدرجة انهم جابوله الجيش اتحفظ علي العربية و في نفس الوقت باعت ناس عند مدارس تانيه بيوزعو منشورات بتدعو لنعم!!!!!...تهديدات لأعضاء ائتلاف شباب الثورة انهم يلمو الدور أحسنلهم و يسيبو الشارع و الجيش يقوللهم عادي... وارد انك تتشتم و تتهدد...كتفلي اللي بيهددك و هاتهولي...و آخرتها تاكسي ماشي بميكروفون بيدعو الناس انهم يقولو نعم و ان اللي بيقو لأ ده آثم....لما شباب الائتلاف حاولو يعترضوه حاول يدهسهم و أصاب فتاة منهم...هي وصلت لكده؟؟ علشان ايه؟؟؟

خلص الاستفتاء بكل ايجابياته و سلبياته... الناس كلها فرحانه بالديموقراطية اللي مارسوها لكن باستطلاع رأي بسيط لغير الجامعيين.....شخصيا لم أسمع إلا ثلاثة إجابات.... قلت نعم علشان الاستقرار....قلت نعم علشان المادة التانيه....قلت نعم للإسلام...واحده قالتلي يا دكتور انت ضحكت علينا...الدايره السودا دي طلعت بتاعت المسيحيين....طيب و بالنسبة للتعديلات... حد قاللها نعم؟؟؟ ماتلاقيش بقي أي معلومة عن موضوع التعديلات ده.... أكثر ما آلمني و أحسست أنه طعنة نافذة هو كلام أستاذ في كلية الطب....قال أنا كنت رايح أقول لأ لأني ضد الإخوان علي طول الخط....رحت اللجنة لقيت مسيحيين كتير قمت قايل نعم!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

طيب ألف مبروك للي قالو نعم و لمصر كلها علي أكبر استفتاء في تاريخها من حيث عدد المصوتين....و بعدين؟؟ إعلان دستوري من الجيش!!!!!! مين؟؟؟؟؟؟؟؟ ايه؟؟؟؟؟ ايه هو ده... أمال ايه لازمة ميتين الاستفتا ده؟؟؟؟ يا قوم الشعب وافق علي ايه؟؟؟؟ علي دستور ١٩٧١ معدل بثمانية مواااااااااااد و ملغي منه ماده..... خير ان شاء الله؟؟؟ اعلان ايه و بتاع ايه؟؟؟ و بعدين ايه الصمت الرهيب اللي الناس فيه ده؟؟؟ يا جماعه المفروض اللي قال نعم يبقي غضبان أكتر من اللي قال لأ.... ده قفز علي الشرعية.....داحنا بنتقنطر عيني عينك و خد معاه كمان قانون حظر التظاهر.... لا دي الناس دي نسيت احنا وصلنا هنا ازاي..... دي ثورة يا بهاوات مش انقلاب عسكري.... خليكم فاكرين كده كويس....

طيب.... السؤال لينا احنا بقي؟؟؟ ايه لزمة ميتين الاستفتا ده؟؟؟ هل هو زرع متعمد للخلاف؟؟ لو ده حقيقي يبقي اللي عملها معلم.... أصل الموضوع غريب برضه... المفروض نظريا ان الاستفتا ده مافيهوش أي مشكله.... نعم و لا في الآخر هيوصلونا لسكه واحده و اختلفنا مين فيهم اللي سكته أطول و بس.... خلاص... هو ده آخره مافيش تاني..... ازاي بقي اتحول لحرب دينية؟؟؟؟ يخرب بيت المخ اللي بيخطط لخراب البلد دي.... الاخوان قالو نعم و بعض المشايخ....يبقي خلاص ندخل شوية ناس تقلبها عنف طائفي بالعافيه و الناس هتصدق طبعا و كل واحد هيتحزب للطائفة و تبقي مدعكة و برضه لازم نبرز ان ساويرس و كام قس قالو لأ علشان تكمل الطبخة... كلنا بلعنا الطعم.... مافيش حد حس إن ده فخ... كلنا افتكرنا ان خلاص الثورة انتصرت و الديموقراطية تأسست و ابتدينا نقسم في الغنايم.... في الآخر طلع ان الموضوع كله افتكاسه.... اذا كانت نعم = اعلان دستوري أمال لأ = ايه؟؟؟ ده لو عمللك ساعتها إعلان دستوري هتبوس ايدك وش و ضهر.... و طلعنا من الاستفتاء ده ضاربين بعض بالصرم... دلوقت يقدر الجيش يكهرب اللي يكهربه و يسحل اللي يسحله.... مين اللي هيقف قصاده؟؟؟ الفئات المتناحرة التي خلفها الاستفتاء؟؟ ابقي قابلني.... خطة شيطان و كلنا شربنا حتي الإخوان الأكثر حنكة و خبرة في التعامل مع ألاعيب النظام القديم شربو لما استكفو و خسرو كتير من شعبيتهم اللي اكتسبوها بموقفهم أثناء الثورة....

احنا لو ما رجعناش ايد واحده هنرجع ألعن من أيام حسني مبارك... الجيش حاسس انه خلاص ركب البلد...بيحكم و احنا ننفذ... ماحدش ملاحظ ان الجيش نزل علي الفيسبوك ٢٧ بيان من ١٧ فبراير لغاية ٦ مارس بواقع بيان و نص في اليوم و من ٦ مارس لغاية يومنا هذا (٢٤ مارس) مافيش ولا بيان؟؟؟ ليه؟؟ لإن خلاص ماعدش فيه لازمه للكلام مع الناس اللي قعدت في بيوتها... انما ممكن اسحلهم و اكهربهم...عادي...حد ليه شوق في حاجه؟؟؟

اثبات حالة....

بالأمس (الخميس 17-3-2011)  أثناء تجول فريق من ائتلاف شباب الثورة بمدينة أسيوط لتوزيع منشورات و تعليق ملصقات لا للتعديلات الدستورية و أثناء مرورهم بشارع متفرع من شارع الجمهورية (بين مصنع الكوكاكولا و أبراج الوطنية) عثروا علي بطاقاتين من بطاقات الاستفتاء علي تعديل الدستور. البطاقتان مختومتان بختم اللجنة الفرعية 91.

توجه الشباب بعد مشاورات و كنت معهم إلي مبني المحافظة في محاولة لتوجيه بلاغ للحاكم العسكري و قابلنا ضباط الجيش الموجودين بالموقع و أخبرناهم بالواقعة و بعد اطلاعهم علي البطاقات أكدو لنا أن هذا لا يعني شيئا و أننا لا يجب أن نفترض سوء النية و عندما أخبرناهم أن هدفنا هو اثبات الحالة و ليس اثارة البلبلة أخبرونا بضرورة الذهاب للنيابة و تقديم بلاغ و بما أن الساعة كانت قد قاربت منتصف الليل فقد كان الأمل ضعيف في أن تكون النيابة لا زالت تعمل في الفترة المسائية فقمت بالاتصال بأحد الأصدقاء من الهيئة القضائية لأخذ رأيه فيما يجب فعله في هذه الظروف بناء علي خبرته في الاشراف علي الانتخابات فنصح بضرورة التوجه الي المحكمة لمقابلة نائب رئيس اللجنة العامة بأسيوط الذي لا يزال في مكتبه نظرا لظروف التحضير في الاستفتاء فتوجهنا الي المحكمة و لكن لم نتمكن من مقابلة نائب الرئيس و قابلنا اثنين من وكلاء النيابة الشباب اللذين أجريا اتصالات عديدة للوقوف علي أبعاد الموقف ثم طمأنانا أن تسريب الأوراق لن يضر و لن يمكن التزوير بهذه الطريقة حيث أن المستشار عضو اللجنة سيشرف علي وضع كل ورقة في الصندوق بنفسه للتأكد من أن كل مواطن قد وضع ورقة واحدة في الصندوق و قد نصحانا بالقدوم صباحا لمقابلة رئيس اللجنة العامة للتحقق من أن الأوراق التي في حوزتنا هي فعلا بطاقات استفتاء حقيقية حيث أن النيابة لم تكن قد تسلمت أوراق الاستفتاء حتي هذه اللحظة...

في العاشرة من صباح اليوم الجمعة 18-3-2011 توجهت مع ياسر سامي الذي عثر علي إحدي البطاقات إلي المحكمة لمقابلة رئيس اللجنة و لكن كان ذلك في منتهي الصعوبة حيث كان توزيع اللجان قد بدأ و كانت المحكمة تعج بالمستشارين ووكلاء النيابة و كان واضحا أن الوقت ليس في صالحهم و أنهم يجب أن ينتهوا من وضع نظام اللجان خلال ساعات معدودة و بالتالي ألقي نائب الرئيس نظرة سريعة علي الأوراق و أخبرنا أن اللجنة الآن غير مختصة في هذه الشكوي حيث أنها لم تتسلم الأوراق و أن النيابة العامة أو قسم الشرطة هما جهتي اثبات الحالة في مثل هذه الظروف و أن النيابة ستواصل العمل بعد صلاة الظهر.

بعد صلاة الظهر لم يتبدل الحال كثيرا بسبب الظروف الاستثنائية و لكن تشاور عدد كبير من المستشارين في كيفية تأمين اللجان ضد التزوير بهذه الكيفية و أوصلونا الي رئيس اللجنة خصوصا و أن مجموعة من شباب الائتلاف كانو فد تجمعوا بالمحكمة و نتيجة ذلك اقترح الرئيس أن يختم كل عضو لجنة أوراق لجنته بختمه الخاص الي جوار ختم اللجنة و نصحونا بتسليم الأوراق الي رئيس اللجنة بمذكرة و لكن الشباب فضلوا الذهاب الي قسم الشرطة و تحرير محضر لاثبات الواقعة و قد تم ذلك برقم 988 اداري قسم ثان أسيوط.

قد يكون التزوير بهذه الكيفية صعبا و قد يكون وجود هذه الأوراق في الشارع في هذا التوقيت يهدف فقط الي اثارة البلبلة و زعزعة الثقة في الإشراف القضائي.... بغض النظر عن الهدف من تسريب هذه الأوراق فقد وجب إثبات الحالة و الطمأنة أن السادة القضاة مدركون لجسامة المسؤولية الملقاة علي عاتقهم للحفاظ علي نزاهة أول استفتاء ديموقراطي في مصر الجديدة...

ملحوظة: عثر اليوم علي بطاقة أخري بختم مختلف الشكل للجنة الفرعية 82

آراء شخصية في التعديلات الدستورية

بدون مقدمات... ماحدش فينا شايف ان التعديلات دي في حد ذاتها مرضية اطلاقا...اللي بيقولو نعم بيقولو كده علشان نحرك الوضع القائم و ندخل في مرحلة جديدة و نطمئن اننا أنجزنا حاجه و الجيش يرجع ثكناته و يبقي في انتخابات بسرعة و الدستور هيتغير انما ماحدش بيدافع عن التعديلات في حد ذاتها للي هي بيت القصيد.... أنا شايف اننا لازم نتكلم في التعديلات نفسها الأول ما لها و ما عليها علي الأقل لأنها زي ما قلنا بيت القصيد...

نبدأ بسم الله....

مادة ٧٥

يشترط فيمن ينتخب رئيسا للجمهورية أن يكون مصريا من ابوين مصريين, وان يكون متمتعا بحقوقه المدنية والسياسية, وألا يكون قد حمل أو أي من والديه جنسية دولة أخري, وألا يكون متزوجا من غير مصرية, وألا تقل سنة عن أربعين سنة ميلادية.

بغض النظر عن كل ما قيل أنها ضد مباديء المواطنة من حيث حرمان مصري من ممارسة حقه في الترشح انما...فين الستات في الماده دي؟؟؟ يعني لو واحده ست اترشحت ايه نظام الشروط؟؟ هييجي حد يقول دي صفصطة و ان الدستور ما ينفعش يلكلك في الكلام و يقعد يقول مصريا أو مصريه و .... لا معلش مافيش أعمال بالنيات هنا....يعني الماده اتكلمت عن الزوجه المصرية...ايه نظام الزوج؟؟ يعني لو المرشحة سيده ممكن زوجها يكون اسرائيلي؟؟؟؟ فين ما يمنع؟؟؟؟ اذا كانت التفاصيل دي ممكن لجنة التعديلات ما تاخدش بالها منها يبقي مافيش لزوم للجنه من أصله و أي حد يقعد يعدل الدستور

مادة ٧٦

ويلزم لقبول الترشيح لرئاسة الجمهورية أن يؤيد المتقدم للترشح ثلاثون عضوا علي الأقل من الأعضاء المنتخبين لمجلسي الشعب أو الشوري, أو أن يحصل المرشح علي تأييد مالا يقل عن ثلاثين ألف مواطن ممن لهم حق الانتخاب في خمس عشرة محافظة علي الأقل, بحيث لا يقل عدد المؤيدين في أي من تلك المحافظات عن ألف مؤيد.
وفي جميع الأحوال لا يجوز أن يكون التأييد لأكثر من مرشح, وينظم القانون الاجراءات الخاصة بذلك كله.
ولكل حزب من الأحزاب السياسية التي حصل اعضاؤها علي مقعد علي الأقل بطريق الانتخاب في أي من مجلسي الشعب والشوري في آخر انتخابات أن يرشح أحد أعضائه لرئاسة الجمهورية.
وتتولي لجنة قضائية عليا تسمي لجنة الانتخابات الرئاسية الاشراف علي انتخابات رئيس الجمهورية بدءا من الإعلان عن فتح باب الترشيح وحتي إعلان نتيجة الانتخاب وتشكل اللجنة من رئيس المحكمة الدستورية العليا رئيسا, وعضوية كل من رئيس محكمة استئناف القاهرة وأقدم نواب رئيس المحكمة الدستورية العليا, وأقدم نواب رئيس محكمة النقض وأقدم نواب رئيس مجلس الدولة.
وتكون قرارات اللجنة نهائية ونافذة بذاتها, غير قابلة للطعن عليها بأي طريق وأمام أية جهة, كما لايجوز التعرض لقراراتها بوقف التنفيذ أو الالغاء كما تفصل اللجنة في اختصاصها, ويحدد القانون الاختصاصات الأخري للجنة.
وتشكل لجنة الانتخابات الرئاسية اللجان التي تتولي الاشراف علي الاقتراع والفرز علي النحو المبين في المادة 88 من الدستور المصرى ويعرض مشروع القانون المنظم للانتخابات الرئاسية علي المحكمة الدستورية العليا قبل اصداره لتقرير مدي مطابقته للدستور.
وتصدر المحكمة الدستورية العليا قرارها في هذا الشأن خلال خمسة عشر يوما من تاريخ عرض الأمر عليها, فإذا قررت المحكمة عدم دستورية نص أو أكثر وجب اعمال مقتضي قرارها عند إصدار القانون, وفي جميع الأحوال يكون قرار المحكمة ملزما للجميع ولجميع سلطات الدولة, وينشر في الجريدة الرسمية خلال ثلاثة أيام من تاريخ صدوره.

الماده دي فيها فيها ثغرات قانونية بالعبيط و الثغرة فيهم تفوت جمل بما ان الجمل أشهر حيوانات مصر اليومين دول.... لذلك أنا هاستعين برأي صديقي المستشار محمد زكي رئيس محمكة ملوي في الماده الطويله طول السنين دي اللي أنا واثق ان ناس كتير ريحت دماغها منها و ما فكرتش فيها أصلا و قالو ان كفايه عليها انها غيرت التفصيلة بتاعة حسني وولده......

يقول المستشار محمد زكي:

"يؤخذ علي هذه المادة أنها أسندت الأشراف علي انتخابات الرئاسة إلي اللجنة الرئاسية والمشكلة تثور حول تشكيل هذه اللجنة فمن المستقر عليه قانونا أن رئيس الجمهورية هو الذي يعين رئيس المحكمة الدستورية العليا طبقا لما ورد في قانونها في المادة 5 من القانون رقم 48 لسنة 1979 بشأن المحكمة الدستورية العليا فإذا كان الاختيار لرئيس المحكمة الدستورية هو لرئيس الجمهورية فكيف نضمن حياد هذه اللجنة وإن كنا نثق تماما في قضائنا المصري الشامخ ولكن يتعين أن تكون القواعد واضحة والنصوص مكملة لدعم الحياد والرئيس الحالي للمحكمة الدستورية العليا كان يشغل رئيس محكمة جنوب القاهرة الابتدائية سابقاً والمسئول عن انتخابات النقابات وقد جاء تعيينه منافيا لأهم مبادئ الأعراف القضائية وهى الأقدمية فقد كان أحدث في الأقدمية من مستشارين جالسين بالمحكمة الدستورية العليا فلا يستطيعون التمثيل في تشكيل المحكمة عند الحكم مما يعنى أنهم قد عزلوا عملاً كونهم أقدم من رئيس المحكمة التي يرئسهم.

وأما عن رئيس محكمة استئناف القاهرة فتمثيله في هذه اللجنة غير مبرر على الإطلاق وقد كان سيادته هو رئيس لجنة الانتخابات البرلمانية الأخيرة وأمتنع عن تنفيذ أحكام قضائية صادرة عن مجلس الدولة بوقف الانتخابات في عدة دوائر انتخابية مما لا يصلح معه أن يمثل في لجنة الانتخابات الرئاسية ولا البرلمانية كون ما أرتكب منه جريمة بنص المادة 123 من قانون العقوبات .بالإضافة لكونه يمت بصلة قرابة للرئيس السابق.

وهو الأمر الذي يتعين معه أن يكون اختيار رئيس المحكمة الدستورية العليا بعيدا عن يد رئيس الجمهورية مما يلزم معه تعديل القانون 48 لسنة 1979 الخاص بالمحكمة الدستورية العليا .

لا سيما وأن هذه اللجنة قراراتها محصنة ضد أي طعن وأنها ستنظر قانون الانتخابات الرئاسية قبل صدوره لتحصينه هو الآخر من شبهة عدم الدستورية . فيتعين أن يتوافر لها كل ضمانات الحياد والنزاهة وبعدها عن أي تأثير من صاحب مصلحة فكيف يكون رئيس الجمهورية وهو صاحب المصلحة اختيار رئيس اللجنة التي ستنظر في انتخاباته. هذا بالإضافة إلى تعارض ذلك مع المادة 68 من الدستور نفسه والتي تحظر "تحصين أي عمل أو قرار إداري من رقابة القضاء"

ويري الدكتور ثروت بدوي الفقيه الدستوري فيما يتعلق بالمادة 76 إن التعديل الجديد لها أبقى على معظم مساوئها في الدستور المعطل، مؤكداً أنها تتضمن 3 مخالفات دستورية بوضعها المطروح حالياً:

1- وهى مخالفتها لمبدأ المساواة بين المستقلين الذين يمثلون غالبية الشعب المصري وبين الأحزاب السياسية التي حصلت على ميزة إضافية، وهى حق من ينتمي إلى أي حزب سياسي له مقعد في البرلمان في الترشح للرئاسة.

2- حسبما يؤكد، فهي تتمثل في أن المادة 76 احتفظت بنفس العبارات السابقة، وهى أنها قررت عدم جواز الطعن على الانتخابات الرئاسية مما يعنى حرمان المواطن من حقه الدستوري في التقاضي والطعن على أي مخالفة يراها.

3- فصل المحكمة الدستورية العليا على قانون الانتخابات الرئاسية قبل تطبيقه، قائلاً إن هذا المبدأ يخالف مبدأ الرقابة القضائية التي تأتى بعد تطبيق القوانين وليس قبلها."

صباحو عنب.... يعني يحطلك لجنه مطعون في تشكيلها و يحميها من الطعن....هي دي الانتخابات الزيرو.... و يخلي واحد ينقطع نفسه بحثا عن توقيعات و التاني يدخل بمقعد في البرلمان بتاع العمال و الفلاحين و الكوته...الله 

مادة ٧٧

مدة الرئاسة أربع سنوات ميلادية تبدأ من تاريخ إعلان نتيجة الانتخاب ولا يجوز إعادة انتخاب رئيس الجمهورية إلا لمدة واحدة تالية.

يا فرحة ما تمت خدها الغراب و طار....واخدين بالكم من قصة تاليه دي؟؟؟ يعني ايه؟؟؟ يعني ممكن الريس ياخدله ٨ سنين و بعدين يديها لولده أربعه و يرجع ياخدها منه ٨ لغاية ما حفيده يكبر و بعدين ينقل يبقي الواد ياخد ٨ و الحفيد ٤ كده علشان نكمل سلسال الفراعنه أمال....ممكن يكون المثال العائلي ده خيالي شوية و ناس تقول احنا خلاص عندنا انتخابات نزيهة و لو اننا لسه ما شوفناش انما المثال الروسي خير دليل ان اللي باقوله ممكن يحصل بوتين مدفيديف بوتين ميدفيديف بوت.........الي أن يشاء الله.....المفروض ان يكون في نص قاطع ان الرئيس له الحق في رئاسة الجمهورية مدتين فقط طول حياته و حياة اللي خلفوه .... 

مادة ٨٨

ويعرض مشروع القانون المنظم للانتخابات الرئاسية علي المحكمة الدستورية العليا قبل اصداره لتقرير مدي مطابقته للدستور.
وتصدر المحكمة الدستورية العليا قرارها في هذا الشأن خلال خمسة عشر يوما من تاريخ عرض الأمر عليها, فإذا قررت المحكمة عدم دستورية نص أو أكثر وجب اعمال مقتضي قرارها عند إصدار القانون, وفي جميع الأحوال يكون قرار المحكمة ملزما للجميع ولجميع سلطات الدولة, وينشر في الجريدة الرسمية خلال ثلاثة أيام من تاريخ صدوره.

نرجع تاني لقصة الدستورية العليا...ازاي رئيسها معين من رئيس الجمهورية و يعرض عليها قانون تنظيم الانتخابات و بعدين أي دستور ده اللي يطابقه القانون؟؟؟ دستور ٧١؟؟ ده من كتر ماحنا عايزينه أوي؟؟؟ تاني....يسقط دستور ٧١ بتعديلاته بسلطاته ببابا غنوجه....

مادة ٩٣

تختص المحكمة الدستورية العليا بالفصل في صحة عضوية أعضاء مجلس الشعب.
وتقدم الطعون إلي المحكمة خلال مدة لاتجاوز ثلاثين يوما من تاريخ إعلان نتيجة الانتخابات, وتفصل المحكمة في الطعن خلال تسعين يوما من تاريخ وروده إليها.
وتعتبر العضوية باطلة من تاريخ إبلاغ مجلس الشعب بقرار المحكمة.

هو مافيش محكمة في البلد غير الدستورية العليا دي ولا قضاة غير قضاتها؟؟؟ يا سادة غياب الرقابة عن أي حاجه أو أي حد مفسدة حتي للملايكة... وبعدين الدستورية العليا دي فيها كام قاضي و ليها كام فرع علي مستوي الجمهورية علشان تشيل الشيلة كلها و بقية النظام القضائي في مصر كلها يقف متفرجا؟؟؟؟؟

مادة ١٣٩

يعين رئيس الجمهورية, خلال ستين يوما علي الأكثر من مباشرته مهام منصبه, نائبا له أو أكثر ويحدد اختصاصاته, فإذا اقتضت الحال إعفاءه من منصبه وجب أن يعين غيره.
وتسري الشروط الواجب توافرها في رئيس الجمهورية والقواعد المنظمة لمساءلته علي نواب رئيس الجمهورية.

يا سلام.... واضح ان الهدف من التعديلات دي اننا نغير العيوب اللي كانت واضحة أوي في تاريخ حسني مبارك علشان الناس تقول اهه آدي التغيير ولا بلاش....شغل فض مجالس و السلام....يعني الماده دي أجبرت الرئيس انه ما يقعدش ٣٠ سنه من غير نائب.... و احنا كنا عايزين نائب ليه؟؟ علشان كنا فاكرين ان ده ضد التوريث.... طيب شروط النائب ده ايه؟؟؟ ما تلاقيش... نفس الشروط الواجب توافرها في رئيس الجمهورية....اللي هي ايه؟؟ يعني ممكن يكون واد عمته ماهو أكيد فيه نفس الشروط...أو الخازوق بقي لو كان ولده...يبقي ١٠٠٪ مطابق للشروط... صباح البانجو المنتشر..... الرئيس ممكن ما يبقاش فيه شروط كتير لأننا هننتخبه انما اللي هيتعين ده لازم يبقي ماليان شروط و خصوصا انه بموجب بقية مواد دستور ٧١ يحل محل الرئيس في مواضع ما ينفعش يكون الرئيس ده هو اللي اختاره أصلا...يعني في حالة اتهام الرئيس بالخيانة العظمي (مادة ٨٥) ازاي نائب معينه خاين بدون قيد أو شرط يقوم بأعمال رئيس الجمهورية؟؟؟

مادة ١٤٨

يعلن رئيس الجمهورية حالة الطوارئ علي الوجه المبين في القانون ويجب عرض هذا الإعلان علي مجلس الشعب خلال السبعة الأيام التالية ليقرر مايراه بشأنه.
فإذا تم الإعلان في غير دورة الانعقاد وجبت دعوة المجلس للانعقاد فورا للعرض عليه وذلك بمراعاة الميعاد المنصوص عليه في الفقرة السابقة وإذا كان مجلس الشعب منحلا يعرض الأمر علي المجلس الجديد في أول اجتماع له ويجب موافقة أغلبية أعضاء مجلس الشعب علي إعلان حالة الطوارئ. 

وفي جميع الأحوال يكون إعلان حالة الطوارئ لمدة محددة لاتجاوز ستة أشهر ولايجوز مدها إلا بعد استفتاء الشعب وموافقته علي ذلك.

مش باقوللكم فض مجالس...ازاي هتعمل استفتاء للشعب بالطريقه اللي احنا عارفينها أثناء حالة الطواريء اللي المفروض انها هتكون طواريء بجد مش طواريء من بتاعة حسني مبارك؟؟ ازاي هتنز ل الناس الشارع و تأمن اللجان و البلد في حالة طواريء حقيقية؟؟؟؟

مادة ١٨٩ فقرة أخيرة مضافة

ولكل من رئيس الجمهورية, وبعد موافقة مجلس الوزراء, ولنصف أعضاء مجلسي الشعب والشوري طلب إصدار دستور جديد, وتتولي جمعية تأسيسية من مائة عضو, ينتخبهم أغلبية أعضاء المجلسين من غير المعينين في اجتماع مشترك, إعداد مشروع الدستور في موعد غايته ستة أشهر من تاريخ تشكيلها, ويعرض رئيس الجمهورية المشروع, خلال خمس عشرة يوما من إعداده، علي الشعب لاستفتائه في شأنه, ويعمل بالدستور من تاريخ إعلان موافقة الشعب عليه في الاستفتاء.
أرجو الانتباه.... "لكل من رئيس الجمهورية و لنصف أعضاء مجلسي" أي أن لهم الحق في طلب اصدار دستور جديد و ليس هناك ما يجبرهم علي ذلك...لازم نص يلزم رئيس الجمهورية أو المجلسين بطلب دستور جديد إذا كنا بنقول هنوافق لإن دي تعديلات مؤقته....في ناس قالت ان ما ينفعش نقول "علي رئيس الجمهورية أو نصف أعضاء...." لإن ده معناه ان كل رئيس هييجي و كل مجلس لازم يغير الدستور....الرد ان زي مانتو بتقولو دي موازد مؤقته لغاية ما نعمل دستور جديد يعني الرئيس اللي هييجي المره دي بس هو اللي هيعمل دستور جديد مش هيكون فيه أصلا الماده دي...

المادة ١٨٩ مكرر

يجتمع الأعضاء غير المعينين لأول مجلسي شعب وشوري تاليين لإعلان نتيجة الاستفتاء علي تعديل الدستور لاختيار الجمعية التأسيسية المنوط بها إعداد مشروع الدستور الجديد خلال ستة أشهر من إنتخابهم, وذلك كله وفقا لأحكام الفقرة الأخيرة من المادة ١٨٩.

يقوللك هي دي الماده بقي اللي فيها الاجبار علي عمل دستور جديد....كلام مش سليم....أولا لإنها مشروطه بأن يكون قد أجري استفتاء للشعب علي عمل دستور جديد و الشعب وافق... و مين يضمن ان ساعتها نفس الناس اللي بتقول عايزين استقرار ما يطلعوش برضه يقولو كفايه كده مش عايزين وجع دماغ بلا دستور جديد بلا هم و ثانيا لإن آخر جمله فيها تربطها بالفقرة الأخيرة من ١٨٩ اللي هي بتخير الرئيس و المجلسين في طلب دستور جديد من عدمه.


المادة ١٨٩ مكرر ١

يمارس أول مجلس شوري, بعد إعلان نتيجة الاستفتاء علي تعديل الدستور, بأعضائه المنتخبين إختصاصاته.
ويتولي رئيس الجمهورية, فور انتخابه, استكمال تشكيل المجلس بتعيين ثلث أعضائه, ويكون تعيين هؤلاء لاستكمال المدة الباقية للمجلس علي النحو المبين بالقانون.

تأكيد علي وكسة تعيين ثلث الأعضاء.

و أخيرا لماذا يجب أن نقول لا للتعديلات الدستورية؟
أولا: إن هذه التعديلات و إن لاقت استحسان بعضنا رغم كا يشوبها فإنها جزء من الصورة و ليست الصورة الكاملة...هذا الجزء سيأتي في ذيله فساد قديم مترسب منذ عام ١٩٧١ و أول أركان هذا الفساد سلطات الفرعون رئيس الجمهورية: و أستعير من الأستاذة سماح نافع هذا الإيجاز:
الرئيس هو رئيس الدولة فى المادة ٧٣
و رئيس السلطة التنفيذية فى المادة ١٣٧
و المجلس الأعلى للهيئات القضائية فى المادة ١٧٣
و قائد القوات المسلحة فى المادة ١٥٠
و هيئة الشرطة فى المادة ١٨٤
و مجلس الدفاع الوطني فى المادة ١٨٢
و مجلس الوزراء إذا حضر اجتماعاته فى المادة ١٤٢
و له سلطة حل مجلس الشعب فى المادة ١٣٦
و الشورى فى المادة ٢٠٤.....
كيف ننتظر من رئيس يملك هذه الصلاحيات و له الاختيار في مسألة تغيير الدستور أن يختار دستور جديد طواعية يحرمه من هذه السلطات...ملحوظة: الملائكه لا تنطبق عليهم شروط الترشح لرئاسة الجمهورية....

ثانيا: إن قبول هذه التعديلات بدعوي تحريك الوضع و البدء في العملية الانتخابية علشان نخلص و الجيش يرجع و البلد تشتغل ده كلام يغفل الكثير من الحقيقة بقصد أو بدون....لإن ببساطة ده هيطول المرحلة الانتقالية الي أجل يعلمه الله وحده....ليه؟؟؟ احنا متفقين اننا عايزين دستور جديد صح؟؟ طيب...لو عملنا دستور جديد و (الدستور الجديد ده زي ماحنا عارفين عايز لجنه دستورية و استفتاء و قصة) و طلع ان الدستور الجديد ألغي نسبة العمال و الفلاحين و كوتة المرأة و هو شيء متوقع بنسبة ٩٥٪ يبقي ايه الوضع؟؟؟ يبقي مجلس الشعب اللي احنا لسه منخبينه غير دستوري و لازم نحله و نعمل انتخابات مجلس شعب جديد...طيب هو رئيس الجمهورية ده حلف اليمين أمام مين؟؟؟؟ مجلس الشعب...اللي هو ايه؟؟ غير دستوري....يبقي رئيس الجمهورية ده ايه لا مؤاخذه؟؟ غير دستوري هو كمان ده بصرف النظر عن ان الدستور الجديد ممكن تتحط فيه شروط جديده لرئيس الجمهورية لا تنطبق علي الرئيس اللي احنا برضه لسه منتخبينه...... يبقي احنا هنكمل بقيت عمرنا ما بين انتخابات و الغاء نتيجة الانتخابات....بالذمة ده كلام؟؟؟ عارفين يعني ايه انتخابات باشراف قضائي كامل؟؟؟ يعني عندك ٥٦ ألف لجنه عايز تحط عليهم كلهم ١٦ ألف قاضي و وكيل نيابه يعني كل مرة انتخابات تاخد ٤ أيام و الإعادة ٤ أيام و بينهم و بين بعض ١٠ أيام و بعدين فرز و اعلان نتيجة و بعدين طعون....و تقوللي عايزين نمشي البلد؟؟؟؟؟؟

ييجي واحد يقوللك لا ماهو المجلس الأعلي للقوات المسلحة هيصدر وثيقة للمجلس و الرئيس يحكمو بيها البلد كده زي ما تيجي بعد صدور الدستور الجديد....طبعا ده تحشيش مش عارف مصدره و ماحدش هيوافق عليه و اذا كان الكلام ده صحيح أمال احنا عمالين نهري وننكت في نفسنا ليه ما الجيش يستنضفلنا ريس كده و كام عضو و نريح المسائل بلا دستور بلا بلد بلا هم.....

ثالثا إذا كنا في حالة نعم و حالة لا هنعمل دستور جديد طب ما نعمل دستور جديد من دلوقت... كل الناس اللي بتفهم بتقول ان دي مش عمليه محتاجه سنين و لا شهور حتي...البلد دي حطت دساتير للعالم كله مش هنعرف نعمل واحد لنفسنا؟؟ و بعدين ماهو كده كده المرحلة دي جايه نأخرها و نلعبكها ليه؟؟؟؟؟؟

ده رأيي من غير تخوين ولا نظريات مؤامرة ولا دفع بالتحالفات السرية و النفعية و الانتهازية السياسية.... وجهة نظر مقابل وجهة نظر و في كل الأحوال دي أول تجربة ديموقراطية في بلدنا من ٦٠ سنه لازم كلنا نقول رأينا بغض النظر هو إيه...البلد بلدنا ما ينفعش نسيب حقنا فيها يضيع.... و لازم الكل يقبل برأي الأغلبية أيا كان....

الأول....

بعد أن ارتبط اسم مدينة اسكندرية بشهداء عنف الشرطة ضد الشعب المصري و قبل 25 يناير كنا بنقول ايه اللي حصل للإسكندرانيه؟؟ مالهم ساكتين كده ليه؟؟؟ مستنيين ايه؟؟؟ الاجابه جتلنا من يوم 25 ليوم 28 يناير اللي قضي فيه شعب الاسكندرية تماما علي آخر تواجد للشرطة في الشارع الي يومنا هذا.... و بما أن جهاز أمن الدولة بها قد ارتبط بكل هذه الحوادث فعندما قرر الشعب اسقاط أمن الدولة كان هذا الجهاز مرشحا بقوة ان يكون......الأول....زي فيلم أمير الانتقام كده....

اللي قرأ الكلمتين اللي كتبتهم عن أمن الدولة في المدونه دي يوم 25 فبراير هيعرف قد ايه الأحداث متسارعة في بلدنا و كلها في اتجاه تغيير الحال الذي كان....فلقد كنا يومها عازمين علي النزول في مظاهرات متزامنة مع مليونية في التحرير لإسقاط حكومة شفيق و أمن الدولة وسط تأكيدات من المسؤولين و علي رأسهم وزير الداخلية (ساعتها بقي...الله يرحم أيامه) أن هذا محض تهريج....

يوم الجمعة 4 مارس تحرك شعب الإسكندرية و حاصر مبني أمن الدوله... أي و الله زي ما باقوللكم كده....ناس من الشعب بتحاصر أمن الدولة....طبعا اللي جوه لسه مافهموش التغيير اللي حصل في البلد و الناس قامو عملو الحاجه الوحيده اللي بيعرفو يعملوها في حياتهم... قعدو يضربو نار و يرمو مولوتوف و كل الهبل ده علي مدي اليوم و الناس بتزيد مش بتقل و الجيش ما تدخلش لغاية ما ابتدي ضرب النار يوصل عند الجيش....مش بس كده...الشباب حبو يكسفو الجيش قامو وقفو بين المبني و قوة الجيش الموجودة في المنطقة علشان يفهمو الجيش ان هما بيحموه!!!!!!!!!!!!!!! طبعا دي كانت حركة في منتهي الذكاء لإن ضرب النار ما وقفش و بالتالي وجد الجيش نفسه مضطر يقتحم المبني....و هنا انتهت المعركة و انفتح المبني ليجد الشباب أطنان من المستندات المفرومة و المحروقة....

ثم توالت الحصارات و الاقتحامات...مساء السبت خمسة مارس توجه عشرة من ائتلاف شباب الثورة بأسيوط إلي أمن الدولة علي أثر اشاعات بتهريب الملفات من المبني....أيوه اللي قريتوه صحيح....أسيوط....حصل....و لما وصلو استقبلتهم الشرطة العسكرية التي أحاطت المبني استقبال حافل حيث هددوهم و أخذو منهم الكاميرا و اعتدو عليهم بالضرب.... فما كان من هؤلاء العشرة الشجعان إلا أن وجهو نداء عبر تويتر و الفيسبوك و التليفونات الي من يهمه الأمر....بعد ساعة أصبح العدد قرابة الأربعة آلاف شخص يحيطون المبني الذي أعلن الجيش أنه خال من ضباطه و أن الجيش قد تسلمه....

من يجد هذا المشهد عاديا بمقاييس هذه الأيام عليه أن يرجع معنا للوراء لنستعرض بعض لمحات من تاريخ أمن الدولة في أسيوط....إن هذا الجهاز قد حول هذا البلد من شعلة تتقد تفاعلا مع أقل حدث سياسي في الثمانينيات من اقرن الماضي إلي بلد مستأنس منزوع الأنياب و الأظافر في مطلع هذا القرن...لقد اتبع جهاز أمن الدولة بأسيوط منهجا منظما للقضاء علي كل القوي و التيارات السياسية و شبه السياسية كان لا بد من تدريسه في كلية الشرطة اذا فشلت الثورة...لقد بدأ هذا الجهاز بتصفية الإسلاميين المسلحين ثم الاسلاميين السياسيين ثم كل السياسيين ثم من لهم أي علاقة بأي سياسيين حتي لو كانت هذه العلاقه هي الانضمام الي أسرة ذات طابع سياسي أثناء الدراسة الجامعية حتي لو كان هذا الانضمام بالخطأ حيث كان الشباب يجمعون الكارنيهات من بلدياتهم لتسجيل الأسرة فقط و ليس للمشاركه....أذكر موقفين قد يوضحا مدي ما كنا فيه....سنة ٩٨ و بمناسبة مرور ٥٠ عام علي تأسيس دولة اسرائيل أرادت مجموعة من شباب الجامعة الخروج في مظاهرة داخل الجامعة فرفض الأمن....قالو نخليها وقفة....رفض أيضا...فقررو لبس الأسود و الجلوس في أحد كافتريات الجامعه كل واحد لوحده و من غير ما يكلم حد....خدوهم كلهم أمن الدولة و رفدوهم كام أسبوع من الجامعة و أنذرو أهلهم إنذار شديد اللهجه انهم مش هيشوفو عيالهم تاني لو ده اتكرر...الموقف الثاني كان في المدينة الجامعية علي ما أذكر عام ٢٠٠٠ حيث سمع تكبير و تهليل في منتصف الليل قال الشباب أنه بسبب أن أحدهم رأي لفظ الجلالة مكتوب في السحاب تلك الليلة نتيجة ذلك اعتقل أمن الدولة ٢٥٠ طالب من المدينة الجامعية دفعة واحدة....

ما حدث يوم ٥ مارس ٢٠١١ في أسيوط من حصار الشعب لمبني أمن الدولة هو اعلان لفشل و سقوط القمع في العالم كله...إن هذا المبني الذي كان الناس يحسبلون و يحوقلون لمجرد المرور من أمامه يسقط الآن كالفأر في المصيدة و يريد الناس اقتحامه و يمنعهم الجيش!!!!!!!!...نحن نعلم أن هذا ليس المشهد الختامي في صراع الشعب مع هؤلاء المجرمين انما هو بداية مرحلة جديدة من الصراع يجرب فيها هؤلاء شعور المطاريد و لكن آليس من الذكاء أن يدركو بعد كل ما مرو به أن إرادة الشعب لا بد أن تنتصر؟؟؟ (ولا إيه يا محمود يا وجدي؟؟) هل هو الكبر؟؟ أم هو الغباء؟؟؟ أم هي محاولة لهدم المعبد علي رؤوس الكل بغية الانتقام من الشعب لأنه رفض أن يعيش ذليلا؟؟؟ عموما هذا هو قدرنا و قدرهم أن لا يعطو أدني فرصة للمصالحة و غفران الماضي...

أعتقد إننا سهل النهارده نقول اننا عايزين نحل أمن الدولة و نحاكم الظباط اللي عذبو الناس من غير ما يطلع واحد يقوللنا مين يجرؤ يقول نحل أمن الدولة أو انتو بتهرجو أو خليهم يتسلو..... ولا إيه يا شفييييييييق؟؟؟؟

 

التاريخ يسطر صفحاته أمام أعيننا

تابعنا جميعا علي قناة أون تي في اللقاء التاريخي الذي جمع رئيس وزراء مصر السابق الفريق أحمد شفيق بالإعلامية ريم ماجد و الأستاذ الدكتور أحمد كمال أبو المجد أستاذ القانون و المفكر الإسلامي البارز و الدكتور عمرو حمزاوي و المهندس نجيب ساويرس في جزئه الأول لينضم اليهم الإعلامي يسري فودة و الأستاذ حمدي قنديل و الدكتور علاء الأسواني بعد مغادرة أ.د./أحمد كمال أبو المجد و د. عمرو حمزاوي في جزئه الثاني.

سخونة الحلقة و أهمية الحوار علي مستوي الشخصيات و المعلومة لم تكن هي فقط أسباب التصاق الجميع بمقاعدهم أمام التلفزيون علي مدي أربع ساعات....حتي الناس اللي كانت قاعده  طمعا في الفرجه علي البلوفر و تصيد الأخطاء و الإفيهات من كلام الفريق إلي تويتر و الفيسبوك و بالرغم من كمية الكوميديا في الموضوع ده انما برضه ما كانش ده السبب الوحيد لبقاءهم كل المده دي متابعين الحلقه ...

غريب هو الشعور أن التاريخ يكتب أمام عينيك....ايه ده....ايه اللي بيحصل ده....رئيس وزراء مصر قاعد قدام واحد من عامة الشعب.....كمان بيقولله أنا اللي هافهمك....و انت ما تكلمنيش كده؟؟؟؟ سبحانك يا رب.....سبحان مغير الأحوال....بعد نطاعة أحمد نظيف و صلفه و تكبره هو و وزراؤه و سحل من يتعرض لهم....يدخل رئيس وزراء مصر في معركة خاسرة علي الهواء مباشرة دون حذف أو تنقيح.....ايه اللي حصل في الدنيا؟؟؟؟.....الدنيا هي هي....احنا اللي اتغيرنا....احنا اللي قررنا اننا نشترك في كتابة التاريخ بعد ما كنا مكتفين بالفرجة....احنا اللي أسقطنا رأس الفساد فاعتبرت الذيول....

لقد دخل السيد شفيق هذه الحلقة معتقدا أنه السياسي الوحيد في الموجودين و أنه سيستطيع أن يراوغ و يتملص من اجابة كافة الأسئلة بشياكته المعتاده و لكن تأتي الرياح بما لا تشتهي السفن.... فقد باغتته ريم ماجد من اللحظة الأولي بسؤال المشاهدين علي تويتر...أمال البلوفر راح فين؟؟؟ قد يعتبر البعض أن هذه سخرية من قبيل "قلة الأدب" و التفاهة من الشباب و مقدمة البرنامج لكن الحقيقة ابعد كثيرا من ذلك.....انها سياسة الفطرة المصرية لإننا لا نزعم أن لنا أي خبرة بالسياسة التي حرمنا من مجرد التفكير فيها علي مدي ستة عقود كامله....أي أن الشباب الذي يستعمل "تويتر" لتوصيل الرساله ولد و تربي في زمن خال من السياسة...و لكنهم بذكائهم الفطري و خفة ظلهم أرادو أن يوصلو رسالة...البس بلوفر....البس بدله.....البس جلابيه....مش هتضحك علينا بلبسك....المهم فعلك اللي ماشوفناش منه حاجه عدله....شفيق السياسي أدرك الرسالة و فهمها و فهم أنه قد وقع في الفخ من اللحظة الأولي....فخ لم يكن مستعد له اطلاقا....مما أفقده ما تبقي له من أعصاب لكي يدير الحوار في اتجاه بعيد عن رقبته.

لقد فشل السيد شفيق في الإجابه علي سؤال واحد علي مدي أربعة ساعات بشكل صادق و مقنع...رغم تدخل المهندس نجيب ساويرس لصد الهجمات عنه و تخفيف حدتها و إعطاؤه الفرصة لالتقاط الأنفاس و بالرغم من التزام القدير حمدي قنديل الصمت معظم الحلقة مكتفيا بما وجهه علاء الأسواني من قذائف....أين برنامجك أيها الفريق؟؟؟ أين منهجك؟؟؟ كيف تخطط لتحقيق رغبات من اعترفت بنجاح ثورتهم و هنأتهم في أكثر من مناسبة و وعدتهم بالبونبوني و لم تفي بوعدك؟؟؟؟.

ان الحديث عن استقالة الفريق شفيق من منصبه لهو نوع من الترضية و حفظ ماء الوجه و محاولة لعدم اعطاء انطباع للثوار بأن متخذ القرار يستجيب للضغط و للضغط فقط و حصريا....بالطبع الرجل أقيل و غالبا حدث ذلك أثناء الحلقة و ليس بعدها... و أزعم أن ذلك قد حدث بعد جملة الدكتور الأسواني "بس أنا يوم الجمعه هانزل و أتظاهر للمطالبه بإن حضرتك تستقيل" لأن متخذ القرار أدرك أن هذه هي الضربة القاضية و إنذار بما سيحدث في الشارع إذا استمر هذا الرجل في موقعه. ثم أن من يريد حفظ ماء وجه الرجل خانه ذكاؤه في الإعلان عن الاستقالة المزعومة علي الفيسبوك ليصبح شفيق أول رئيس وزراء في العالم تعلن استقالته بهذه الطريقة.... 

ناس كتير بتعيش عمر طويل و تموت من غير ماتشوف حدث تاريخي واحد و احنا التاريخ فتح لنا صفحة بيضاء و قال اتفضلو....هاتو ما عندكم... و اقتبس من فتوي جبهة علماء الأزهر التي صدرت في أوائل أيام الثورة ما فيه مفتاح هذا التحول :

 "فليخرج كل قادر ليسمع الظالمين صوته، وليبرئ ذمته أمام الله تعالى الذي لا يقبل عذرا من مُخَذِّلٍ أو متخاذل في مثل تلك المواقف ، حيث قال جل جلاله ( إن الذين توفاهم الملائكة ظالمي أنفسهم قالوا فيم كنتم قالوا كنا مستضعفين في الأرض قالوا ألم تكن أرض الله واسعة فتهاجروا فيها فألئك مأواهم جهنم وساءت مصيرا) النساء 97: 99.- اخرجوا لتعذروا أولا إلى الله ، ثم لتعذروا ثانيا إلى العالم الذي يستشرفكم اليوم، ثم لتعذروا ثالثا إلى التاريخ الذي لا يغفل ولا يتغافل. 

- اخرجواعلي نية الأخذ علي يد الظالم قبل أن يخرج غيركم ممن لا يرقبون فيكم إلا ولا ذمة من ملاحدة وشيوعيين .
- اخرجوا فدخول الجحور غير جائز لغير النمل
- اخرجوا وانفروا على وعد الله لكم ،وتصديقا به، وإيمانا برسوله صلى الله عليه وسلم، رسوله الذي قال" إذا رأيت أمتي تهاب أن تقول للظالم يا ظالم فقد تُوُدِّع منهم"
انفروا وأنتم موقنون بصدق موعود الله لكم بأنه ( سيهزم الجمع ويولون الدبر)
انفروا علي أمر الله تعالي لمن كان في مثل حالكم ( ادخلوا عليهم الباب فإذا دخلتموه فإنكم غالبون وعلي الله فتوكلوا إن كنتم مؤمنين)"

كلمة أخيرة: الأستاذ الدكتور عصام شرف هو أول رئيس وزراء تأتي به الثورة....و لقد بدأ الرجل توليه للمسؤلية بداية مبشرة حيث أعلن من ميدان التحرير أنه يستمد قوته من هذا المكان و أنه قد أتي لينفذ مطالب الشعب...إنه أول مسؤول في تاريخ مصر الحديثة يقول ذلك و نستطيع أن نزعم أنه يعنيه....هذا الرجل أمامه الكثير من المعارك ليخوضها و لسوف يحارب بشراسة من أذناب الفساد

الكنبة

طول عمر مصر بغض النظر عن أحزابها و طوائفها و انتماءات شعبها طول عمرها فيها تلات أحزاب و بس حزب الفساد و حزب الكنبه و حزب الشارع....

حزب الفساد ده قاعد فوق بيدير البلد لحساب مزاجه....حزب الكنبه قاعد بيتفرج علي الجزيره و يقرا الدستور و صوت الأمه في البيت و يسب و يلعن في حال البلد و الحراميه اللي نهبوها في البيت و القهوة و الشغل و الفيسبوك ....كتير بيفضلو علي الحال ده طول عمرهم و شويه يهجو علي أمريكا و شويه علي الخليج و شويه يموتو في البحر و هما رايحين ايطاليا أو راجعين من السعوديه... أما حزب الشارع ده فضل طول عمره أقليه بيحارب حزب الفساد بقدر المستطاع....و لكنه كان مخترق و منقسم علي نفسه و مطارد من كلاب حزب الفساد....

حزب الكنبه طول عمره الأغلبيه اللي الحزبين التانيين مصلحتهم معاها...حزب الفساد ضارب ايده في جيوبهم و عمال يضللهم و ينيمهم و يشغلهم بحرب شلت بينهم و بين بعض (يعني كل واحد يتناول الشلته اللي جنبه و يرزعها في دماغ التاني من غير ما يقومو من علي الكنبه) من عينة الزمالك مظلوم و الأهلي ده واكلها والعه....المسيحيين دول ماحدش يعرف يكلمهم و المسلمين دول ظلمه و عنصريين.... الخ و حزب الشارع بيحاول يضم له ناس من اللي قاعدين علي الكنبه بما تبقي له من الوسائل بعد أن نزعت منه معظمها...حتة جرنال كده صاحبه مقطع بطاقته أو مدونه علي السريع كاتبها واحد مودع أهله....

المهم ان حزب الكنبه بكل غضبه و تزمره و سلاطة لسانه ما عملش أي انجازات في تلاتين سنه إلا الاعتراض و السب و اللعن و البلد في النازل....اعترض علي السرقه بقت نهب علني....اعترض علي تزوير الانتخابات بقت مليطه...اعترض علي اللي مخلل فيها....بقي هو و ابنه و عيلة أمه كلها...قال طالما لاقي عيشي و عيش عيالي تولع...بقي طابور العيش مذبحة القلعة. أعضاء الحزب برضه معذورين...ماهو يا بخت من اعتبر بغيره...كل واحد خايف علي الشلته اللي قاعد عليها لاحسن تتسحب من تحته أو حد غيره ييجي يقعد عليها أو يتمرمط و مستقبله هو و عياله يضيع و بعدين دي مش بلدنا دي بلدهم و بلد بايظه أكيد مش أنا اللي هاصلح كل الزروطه دي.

لسبب غير معلوم أو لمجموعة من الأسباب أو لإن الحكاية بقت استهبال علني من حزب الفساد اللي حتي ماعدش مهتم انه ينيم جماعة الكنبه و يصرفلهم حبوب الهلوسه في النسكافيه علي رأي القذافي....لسبب من هذه الأسباب أو كلها مجتمعه انضمت مجموعه كبيره و غير مسبوقه من أعضاء الكنبه لحزب الشارع....مش بس كده دول كمان غيرو سلوك حزب الشارع فأصبح كله علي قلب رجل واحد.

في تلات أيام نجح حزب الشارع الجديد في القضاء علي أسطورة جهاز أمن قلعة الفساد بدون سلاح...بدون عنف و فرض مطالبه عل الساحه المطلب تلو الآخر و انهارت دفاعات و خطوط بنيت في ٣٠ سنه الواحد تلو الآخر و في ١٨ يوم أجبر حزب الشارع من هدم البلد ليبني امبراطوريته علي الرحيل تاركا ما بني خلفه لتبدأ مرحلة جديدة من الصراع....

أدرك حزب الفساد أن عليه الرجوع للحيلة و التفكير بعد أن كان أي غبي ممشي الأمور حلاوه اعتمادا علي غفوة أصحاب الكنبه...أدرك أن المواجهة مع حزب الشارع بحالته هي معركة خاسره بكل المقاييس فقرر الالتفاف...

الاستقرار.....الأمن....اعطاء الفرصه للحكومه الجديدة....البلد حالها واقف....عودة السياحة....المادة الثانية من الدستور....الحق المسيحيين اللي بيتقتلو و الجيش اللي بيعتدي علي الكنيسه....احنا آسفين يا اصطي حسني....هي العيال دي مش عاجبها حاجه و كل شويه مظاهرات عايزين ايه تاني ما الثورة نجحت...احنا حققنا اللي احنا عايزينه....اجيش صبره بدأ ينفذ ....أطنان من الشعارات و الزن علي دماغات الناس بمعاونة أصيله من الناس اللي تمسكت بالكنبه حتي الآن و الهدف هو تشتيت الانتباه عن الأهداف الرئيسية و إذا تشتت الانتباه أصبح حزب الشارع عديم القيمة....يالا كلنا نرجع بسرعه نقعد علي الكنبه قبل ما مكان لا مؤاخذة يبرد...

لازم كل أعضاء الكنبة الكرام يعرفو حاجه مهمة جدا....لو فضلت الأشخاص اللي تبع حزب الفساد القديم دول موجودين خلال الست شهور القادمين و اتعملت الانتخابات برلمانيه و رئاسية تحت اشرافهم يبقي ما كانش في داعي اطلاقا حد يتعب نفسه و ينزل الشارع و احنا آسفين فعلا يا اسطي....احنا بنتكلم عن حكومة الحزب الوطني....الحزب الوطني نفسه...المجالس المحليه اللي هي أس كل الفساد المتداري....أمن الدولة و الفاسدين في وزارة الداخليه و ماحدش يقوللي حبيب العادلي....و الباقيين راحو فين؟؟؟

لازم تعرفو كمان ان قوة الثورة دي مش في الجيش و مش في أي حاجه غير قوة الشارع...احنا مش بنخون الجيش (في الرساله دي علي الأقل) لكن تعالو نحلل موقف الجيش... الجيش التزم الحياد الإيجابي من أول يوم نزل فيه الشارع (طبعا باستثناء موقعة الجمل ده كان استهبال ايجابي) و كان موقفه دائما مبني علي قياس موازين القوة أو بمعني آخر قياس مدي اصرار الشارع علي الثورة و مدي شعبية هذه الثورة....انما لم يقدم علي تنفيذ خطوة واحدة للأمام بينما الشارع في حالة ثبات....كان دائما تصرف الجيش في أعقاب تزايد ملحوظ للأعداد و الاحتجاجات....هل تعتقدون للحظة أن خطاب التفويض يوم ١٠ فبراير إذا وجد قبول عند بعض الناس و قلت الأعداد في التحرير كان سيحدث ما حدث يوم ١١؟؟ الإجابة هي بالقطع لا.... ثم بعد التنحي....ما الذي أدي إلي إقالة حكومة شفيق الأولي رغم عدم وجود أي بوادر؟؟ الاجابة مليونية جمعة تأكيد المطالب التي خطب فيها الشيخ القرضاوي....

ما الذي أدي الي تحول غريب في موقف الجيش من اعتصام الجمعة ٢٥ فبراير؟؟ أليست قلة الأعداد؟؟ ماحدش يقوللي دول كانو بلطجيه و شتمو الجيش....أكيد اعتصام ال ١٨ يوم اللي أسقطو مبارك كان فيهم بلطجية بيشتمو الجيش و بعدين شادي الغزالي حرب مش بلطجي علشان يتسحل و ينضرب...فجأة بقي نصب الشهداء في التحرير هدف للجيش ليدمره و يأتي بواحد جديد في اليوم التالي لمصالحة الجماهير؟؟؟ الإجابه علي كل هذه التساؤلات هي في ميزان قوة الشارع....ماحدش هيعملنا حاجه احنا ماعملناهاش لنفسنا....الجيش حجز بين الشعب و كلاب النظام انما ما عملش الثورة و لا فرض مطالبها

و أخيرا...أعزائي حزب الكنبه...انتو خدتو فرصتكم كامله علي مدي ٣٠ سنه ما عملتوش فيهم حاجه إلا انكم سيبتو البلد تتنهب علي كل شكل و لون...عيشتو الاستقرار اللي بتحبوه و الأمان الخرافي اللي ولد كل البلطجيه اللي بتصرخو منهم النهارده...الاقتصاد غار في داهيه و بقي في يد شلة حراميه و البورصه اللي بتعيطو عليها كانت أحد الوسائل اللي يسرقو بيها الملاليم اللي انتو حاطينها تحت البلاطة و  في نفس الوقت تدعو للريس بالصحة أصل صحته من صحة البورصه و مع ذلك ياما شوفتو فيها اتنين اسود و تلات مهبب و اربع مطين....جايين النهارده تقولو الثورة وقعت البورصه و الاقتصاد...ياخي الحمد لله....

قوتنا في قوة ثورتنا يعني في قوة الشارع و اذا كنتم فاكرين انكم هتتفرجو عليها لغاية ما تبقي دولة ديموقراطية و ينصلح حالها كده من نفسه....أنصحكم تنامو أحسن و تصحو كمان ٣٠ سنه